詩篇 140 - 現代台語譯本漢字版(TTVH)-闽南语

大闢的詩，交互聖樂長。祈求上主保護

1上主啊，求你救我脫離歹人，

保護我脫離兇惡的人。

2𪜶心內圖謀邪惡，

不時製造紛爭。

3𪜶的舌親像毒蛇的舌赫呢利；

𪜶的嘴唇有毒蛇的毒。

4上主啊，求你保守我脫離歹人的手，

保護我脫離強暴的人；

𪜶圖謀欲給我捙倒。

5驕傲的人暗中掘陷阱，張羅網，

佇路邊設圈套欲害我。

6我對上主講：「你是我的上帝。」

上主啊，求你俯耳孔聽我懇求的聲。

7至高的上主 — 我大氣力的拯救者啊，

佇交戰的時，你有保護我。

8上主啊，求你毋通互歹人的心願實現，

毋通互𪜶的計謀成功，致到自高。

9毋通互圍困我的人勝利；

著互𪜶嘴唇的毒害害著𪜶家己。

10求你用啲𤏸的火炭降落佇𪜶身上；

給𪜶㧒落火，擲佇深坑，𣍐閣起來。

11求你互製造是非的人佇地上徛𣍐牢，

著互災禍給強暴的人隨牢牢，攏給𪜶拍倒。

12我知上主會為著困苦的人申冤，

為著散赤人主持公道。

13義人一定會感謝你；

正直的人會當佇你面前徛起。