1作主人的，著公平合理對待恁的奴隸，恁知，恁佇天頂嘛有一位主人。
勸勉的話2著繼續迫切祈禱；祈禱的時著警醒，著感謝。
3嘛著為著阮祈禱，求上帝互阮有傳信息的機會，通宣揚基督的奧祕；我是為著此個才啲坐監。
4著為著我祈禱，互我會當將應該講的奧祕講清楚。
5著善用機會，對待未信者著有智慧。
6講話不時著溫和，親像用鹽調味，知影著按怎應答逐個人。
最後的請安7關係我一切的代誌，親愛的兄弟推基古會給恁講；佇主的工作伊及我做夥作僕人，忠實啲服事。
8我差伊去恁遐，是愛報恁知阮遮的情形，互恁的心得著鼓勵。
9阿尼西謀會及伊做夥去；伊是恁遐的人，是忠實閣親愛的兄弟。𪜶會將阮遮一切的代誌報恁知。
10及我做夥坐監的亞里達古欲給恁請安；巴拿巴的表小弟馬可嘛欲給恁請安。關係馬可，我已經有給恁交代，伊去的時著給伊接待。
11彼個叫做猶士都的耶穌嘛欲給恁請安。佇猶太人信徒中只有此三個人為著上帝國啲及我同工，𪜶有互我真大的安慰。
12對恁遐來基督耶穌的僕人以巴弗欲給恁請安。伊時常為著恁迫切祈禱，求上帝互恁徛在，作成熟的人，確信上帝攏總的旨意。
13我通證明，伊確實為著恁及住佇老底嘉以及希拉坡里的人辛苦做工。
14親愛的醫生路加及底馬欲給恁請安。
15請恁替我給老底嘉的兄弟姊妹及寧法，以及佇𪜶兜啲聚會的教會請安。
16此張批恁讀了，著設法嘛互老底嘉的教會讀；恁嘛著讀老底嘉的教會轉互恁的批。
17著給亞基布講：「你所領受服事主的職務一定著完成。」
18我保羅親筆給恁請安。
著會記得我啲坐監。
願上帝的恩典及恁同在！
Who We AreWhat We EelieveWhat We Do
2025 by iamachristian.org,Inc All rights reserved.
