路加福音 16 - 現代台語譯本漢字版(TTVH)-闽南语

𠢕變竅的管家

1耶穌閣對門徒講：「有一個人真好額，伊有一個管家；有人對主人檢舉此個管家浪費伊的財產。

2主人叫伊來，給伊問：『我有聽著你此個代誌，到底是按怎？你所管理的賬簿交出來，毋互你閣作管家。』

3彼個管家家己想講：『主人欲給我辭頭路，毋互我閣作管家，今我欲按怎？攑鋤頭無氣力，作乞食閣驚見笑。

4今，我知著按怎做，無作管家以後才有朋友通給我收留。』

5「管家就將主人的債務人一個一個叫來，給頭一個講：『你欠阮主人偌多？』

6伊應講：『一百桶橄欖油。』管家給伊講：『你的借條佇遮，趕緊坐落來，給改做五十。』

7管家閣給另外一個講：『你欠偌多？』伊應講：『一百石麥仔。』管家給伊講：『你的借條佇遮，給改做八十。』

8「主人褒獎此個無老實的管家做了真巧，因為屬世間的人處理世事比屬光明的人較有變竅。」

9耶穌繼續講：「我給恁講：著用不義的錢財為著家己結交朋友，按呢錢財無去的時，𪜶會接納恁入去永遠徛起的所在。

10對真細項代誌忠實的人，對大項代誌嘛會忠實；對真細項代誌無老實的人，對大項代誌嘛𣍐老實。

11所以，恁對不義的錢財若無老實，啥人欲將真正的財寶交代恁？

12恁對別人的物若無老實，啥人欲將恁的物互恁？

13「無一個僕人會當服事兩個主人；伊若毋是怨恨此個，疼彼個，就是看重此個，看輕彼個。恁𣍐當像時服事上帝閣服事錢財。」

律法及上帝國(太 5.31-32；11.12-13；可 10.11-12)

14許個貪財的法利賽派的人聽著耶穌講諸個話就給伊恥笑。

15耶穌給𪜶講：「恁諸個人佇人的面前自稱做義，毋拘上帝知恁的內心，因為人看做尊貴的，對上帝來看是通厭惡的。

16「摩西的律法及先知的教示到施洗者約翰結束。對彼時起，上帝國的福音就傳出去，人人攏硬欲爭入去。

17毋拘天地消失比廢除律法的一劃閣較簡單。

18「無論什麼人，離伊的某去娶別個婦仁人就是犯姦淫；娶互人離婚的婦仁人嘛是犯姦淫。」

好額人及拉撒路

19「有一個人真好額，伊穿紫色真高貴的衣服，逐日奢華宴樂。

20閣有一個乞食，名叫做拉撒路，歸身軀生瘡，倒佇彼個好額人的門口，

21欲拾好額人桌頂落落來的屑仔止飢；狗嘛來舐伊的瘡。

22「後來，此個乞食死去，天使給伊導去亞伯拉罕的身軀邊。彼個好額人嘛死去，閣埋葬。

23伊佇陰府受真大的痛苦，攑頭看，看著亞伯拉罕佇遠遠的所在，拉撒路佇伊的身軀邊。

24伊就出聲叫：『我的祖亞伯拉罕，憐憫我！請你差拉撒路用指頭仔尾搵水來互我的嘴舌涼一下，因為我佇此個火焰中啲受苦楚。』

25「毋拘亞伯拉罕講：『子啊，著會記得你在生享受一切的快樂，毋拘拉撒路在生受盡痛苦，伊現在佇遮得著安慰，你佇遐啲受苦楚。

26毋若按呢，阮及恁的中間有大深淵隔開，按呢對遮無人會當過去恁遐，嘛無人會當對恁遐過來阮遮。』

27彼個好額人就講：『我的祖啊，既然是按呢，我懇求你差拉撒路去阮老父的厝；

28我有五個兄弟佇遐，伊通去給𪜶警告，才免𪜶嘛來到此個非常痛苦的所在。』

29「毋拘亞伯拉罕應講：『你的兄弟有摩西及先知，𪜶應該去聽𪜶的話。』

30彼個好額人應講：『我的祖亞伯拉罕，𪜶𣍐啦。若有人對死人中閣活去尋𪜶，𪜶就會悔改。』

31亞伯拉罕給伊講：『𪜶若毋聽摩西及先知的話，有人對死人中閣活，𪜶嘛𣍐相信。』」