民數記 36 - 現代台語譯本漢字版(TTVH)-闽南语

繼承家業的女子結婚的條例

1 約瑟的後代，瑪拿西的孫瑪吉的子，基列宗族的族長來見摩西及以色列人逐宗族的領袖，

2講：「上主有命令我的主用抽籤的方式分土地互以色列人做產業，我的主嘛照上主的命令將阮的親族西羅非哈的家業分互伊的查某子。

3毋拘𪜶若嫁互以色列別支族的人，𪜶的家業就會對阮祖公的產業撥過互𪜶的丈夫彼旁的支族，按呢阮抽著的產業就會減少。

4到以色列人恩惠的年，諸個查某子的家業就會加佇𪜶的丈夫彼旁的支族；阮祖公支族的產業就減少。」

5 摩西照上主的命令對以色列人講：「約瑟後代的支族講了有理。

6關係西羅非哈的查某子，上主按呢吩咐：𪜶通選擇𪜶合意的人，毋拘著嫁互仝支族、仝宗族的人。

7按呢，以色列人的產業就𣍐對此個支族撥去互別個支族。以色列人逐個著守牢𪜶家己祖先支族的產業。

8以色列逐支族所有繼承產業的女子，著嫁互仝支族的人，互以色列人會當繼承𪜶祖先的產業。

9按呢，產業才𣍐對此族轉去別個支族；以色列逐支族的人著守牢𪜶家己的產業。」

10-11 西羅非哈五個查某子，瑪拉、得撒、曷拉、蜜迦及挪阿，攏照上主對摩西的命令做，嫁互𪜶的叔伯兄弟。

12𪜶攏嫁互約瑟的後代，瑪拿西支族的家庭；𪜶的家業留佇𪜶老父的宗族內面。

13以上是上主佇約旦河邊，耶利哥對面的摩押平原，通過摩西互以色列人的命令及規例。