約書亞記 24 - 現代台語譯本漢字版(TTVH)-闽南语

約書亞佇示劍及人民重新立約

1 約書亞聚集以色列眾支族到示劍。伊召以色列的長老、族長、審判官，以及官長來；𪜶就徛佇上帝的面前。

2約書亞對所有的人民講：「上主 — 以色列的上帝按呢講：『古早，恁的祖先他拉，就是亞伯拉罕及拿鶴的老父住佇幼發拉底河彼旁，服事別個神明。

3我導恁的祖先亞伯拉罕對幼發拉底河彼旁出來，行透迦南全地；閣互伊有真多子孫：我將以撒賞賜伊，

4閣用雅各及以掃賞賜以撒。我將以東山區賞賜以掃做家業，互雅各及伊的子孫落去埃及。

5我差派摩西及亞倫，降災禍攻擊埃及，然後導恁出來。

6我導恁的列祖出埃及，來到紅海；埃及人派戰車及馬兵追趇恁的列祖。

7恁的列祖求叫上主，我就用烏暗隔開恁及埃及人，閣用海水給埃及人淹死。我佇埃及所做的事恁攏親目看見。

「『後來恁住佇曠野真久。

8我導恁到約旦河東旁亞摩利人住的所在徛起；𪜶及恁交戰，我將𪜶交佇恁的手，互恁得著𪜶的地；我為著恁給𪜶剿滅。

9彼時，摩押王西撥的子巴勒起來及以色列人交戰，閣派人去叫比珥的子巴蘭來給恁咒詛。

10我毋聽巴蘭的話，顛倒互伊連續給恁祝福；按呢，我就救恁脫離伊的手。

11恁過約旦河，到耶利哥；耶利哥人、亞摩利人、比利洗人、迦南人、赫人、革迦撒人、希未人、耶布斯人，攏及恁交戰；我將𪜶交佇恁的手。

12我降瘟疫佇𪜶中間，將亞摩利人兩個王對恁的面前趕出去；毋是用恁的刀，嘛毋是用恁的弓。

13我賞賜恁的土地，毋是恁家己開墾的；城，嘛毋是恁起造的；恁住佇彼內面，食毋是恁栽種的葡萄園及橄欖園的果子。』

14「今，恁著敬畏上主，誠心實意服事伊，將恁的列祖佇幼發拉底河彼旁及佇埃及服事的神明除去，來服事上主。

15若是恁無愛服事上主，今仔日恁著揀恁愛欲服事的；看是恁列祖佇幼發拉底河彼旁所服事的神明，抑是恁徛起此個地的亞摩利人的神明。論到我及我的家，阮決斷欲服事上主。」

16人民回答講：「阮一定無欲棄拺上主，去服事別個神明。

17因為上主 — 阮的上帝有導阮及阮的列祖對埃及做奴才的家出來，佇阮的目睭前行許個大的神跡；佇阮行過的路，經過的逐國，伊攏有給阮保護。

18上主閣為著阮趕出住佇此所在的亞摩利人及列國的人，所以阮嘛欲服事上主，因為伊是阮的上帝。」

19毋拘，約書亞對人民講：「恁𣍐當服事上主，因為伊是聖的上帝，是要求全情服事伊的上帝，𣍐赦免恁的過失，恁的罪惡。

20恁若離開上主去服事外邦的神明，上主佇賜福氣互恁了後，會越轉來降災禍給恁消滅。」

21人民應約書亞講：「𣍐，阮𣍐離開上主！阮一定欲服事上主。」

22 約書亞對人民講：「恁揀欲服事上主，恁家己著做家己的證人。」

𪜶應講：「好，阮願意作證。」

23 約書亞講：「今恁著將恁中間外邦的神明除去，互恁專心歸向上主 — 以色列的上帝。」

24人民應約書亞講：「阮一定欲服事上主 — 阮的上帝，聽趁伊的話。」

25彼日約書亞就導人民及上主立約，佇示劍為𪜶制定規則及條例。

26約書亞將諸個話攏寫佇上帝律法的冊，閣將一塊大石頭𫞼佇上主聖所邊仔的橡樹腳。

27約書亞對所有的人民講：「恁看，此塊石頭欲給咱作證。此塊石頭有聽著上主所有吩咐咱的話，欲對恁作證，才免恁背逆恁的上帝。」

28約書亞解散人民，𪜶就倒去家己分著的土地。

約書亞及以利亞撒死(士 2.6-10)

29諸個事以後，上主的僕人，嫩的子約書亞死，享年一百十歲。

30以色列人給伊安葬佇以法蓮山區，迦實山北旁的亭拿‧西拉伊分著的土地。

31 約書亞活啲的時，以色列人服事上主；伊死了後，許個知影上主為以色列人所做一切的事的長老猶活啲的時，人民猶原服事上主。

32 以色列人將𪜶對埃及帶倒來約瑟的骨骸安葬佇示劍，就是雅各早前用一百塊銀對示劍的開拓者哈抹的後代買來的地；此塊地做約瑟後代的家業。

33 亞倫的子以利亞撒嘛死；𪜶將伊安葬佇伊的子非尼哈所得著以法蓮山區的山崙仔頂。