以賽亞書 61 - 現代台語譯本漢字版(TTVH)-闽南语

拯救的好消息

1至高上主的神臨到我，

因為上主用油抹我；

伊差我去傳好消息互散赤人，

醫治心靈破碎的人，

宣布受掠的得著解放，

受關的出監牢，

2宣布上主恩待人的年

及咱的上帝替伊的子民申冤的日，

安慰所有悲哀的人；

3佇錫安悲哀的人，伊賜𪜶花冠代替火灰，

歡喜的油代替悲哀，

稱讚的衫代替憂傷的心。

𪜶受稱做「公義的橡樹」，

是上主栽種的，欲顯明伊家己的榮光。

4𪜶會重建久久拋荒的地，

修建早前毀壞的所在，

重再起造世世代代荒廢的城市。

5外族人會來飼恁的羊群，

外國人會替恁耕作田園，

照顧恁的葡萄園。

6恁欲叫做「上主的祭司」，

侍奉咱的上帝。

恁會得著列國的財物，

享受𪜶的財富來誇口。

7恁有受著雙倍的凌辱；

人想講凌辱是恁應得的份額。

總是，恁會佇家己的土地得著雙倍的產業；

恁的歡喜會永遠存續。

8我上主意愛公平，

厭惡搶奪及犯罪。

我欲用信實給𪜶報賞，

欲及𪜶立永遠的約。

9𪜶的後代佇列國中會真出名；

𪜶的子孫佇萬民中有好名聲。

所有看見𪜶的人會承認

𪜶是上主賜福的子民。

10我會因為上主大大歡喜，

因為我的上帝快樂。

上帝用拯救做衫給我穿，

用勝利做外袍給我幔；

親像新郎戴花冠，

新娘掛珠寶。

11抵親像土地互種籽茁芽，

田園互所撒的生長，

至高的上主會互勝利及讚美

佇萬國的面前開花結籽。