民數記 4 - 現代台語譯本漢字版(TTVH)-闽南语

哥轄宗族的職責

1上主吩咐摩西及亞倫，講：

2-3「恁著照宗族及家族，點算利未人哥轄的後代，對三十歲到五十歲佇會幕當職作工的人的人數。

4哥轄的後代著負責管理會幕內面至聖的物。

5「欲徙營的時，亞倫及伊的子著入去會幕，將遮截的帳簾剝落來蓋約櫃；

6閣著用上等的皮蓋佇頂面，然後蓋純藍的布，才給約櫃穿槓。

7「𪜶著用藍色的布舒佇排獻祭的餅的桌；將諸個盤、𥐵仔、奠酒祭的壺及杯，排佇彼頂面；獻祭的餅著留佇桌頂。

8排獻祭的餅的桌著蓋朱紅色的布，閣蓋上等的皮，才給桌仔穿槓。

9「𪜶著提藍色的布蓋燈台、燈台的杯、燈剪、燈盤，以及所有貯油的器具。

10閣著將燈台，及燈台所有的器具，用上等的皮包好勢，下佇運搬的架頂面。

11「𪜶著舒藍色的布佇金祭壇頂面，閣用上等的皮蓋啲，才給壇穿槓。

12嘛著用藍色的布包聖所內面所有的器具，才用上等的皮蓋啲，下佇運搬的架頂面。

13𪜶著將祭壇的火灰清互清氣，用紫色的布蓋佇祭壇頂面。

14閣著將祭壇啲用的火鼎、肉叉、托仔、盤下佇祭壇頂面，然後用上等的皮蓋佇彼頂面，才給壇穿槓。

15「欲徙營的時，亞倫及伊的子將聖所及所有的器具包好勢，然後哥轄的子孫來扛；毋拘𪜶毋通摸著聖的物，才免死；會幕內面諸個物件是哥轄的子孫著扛的。

16「祭司亞倫的子以利亞撒著負責管理點燈的油、香料、常常獻的素祭，及通抹的聖油；嘛著顧守會幕及內面所有的物件，以及聖所及聖所所有的器具。」

17上主吩咐摩西及亞倫，講：

18「恁毋通互哥轄宗族對利未人的中間受消滅。

19亞倫及伊的子著入去會幕指派𪜶逐個人著做的工作，著扛的物件，通互𪜶佇倚近至聖的物的時，猶會活，免死。

20𪜶𣍐用得入去看聖物運搬的預備工作，才免死。」

革順宗族的職責

21上主吩咐摩西，講：

22「你著照宗族及家族點算革順的後代，

23三十歲到五十歲佇會幕當職作工的人的人數。

24革順的宗族著辦理的工作，著扛的物件是諸個：

25𪜶著扛會幕許個帳幕、會幕、會幕的蓋、彼頂面上等的皮做的蓋、會幕的門簾、

26會幕及祭壇周圍的埕的布帷及門簾、索仔，及𪜶啲用所有的器具；及諸個器具有關的工作，𪜶攏著負責。

27革順的後代著照亞倫及伊的子孫的命令扛物件，辦理事務；𪜶欲扛的物件，恁著交代𪜶負責。

28以上是革順宗族佇會幕的職責；𪜶著受祭司亞倫的子以他瑪監督。」

米拉利宗族的職責

29「你著照宗族及家族點算米拉利的後代，

30三十歲到五十歲佇會幕當職作工的人的人數。

31𪜶佇會幕內著負責的職務，就是扛會幕的板、橫楗、柱、有榫孔的座、

32埕周圍的柱、柱的座、杙仔及索仔，以及啲用的器具；逐項著扛的物件，攏著有指定的人負責。

33以上是米拉利宗族佇會幕的職責；𪜶著受祭司亞倫的子以他瑪監督。」

利未人的人口調查

34 摩西、亞倫，及會眾的首領，照宗族及家族點算哥轄的後代，

35三十歲到五十歲佇會幕當職作工的人的人數，

36共兩千七百五十名。

37這是摩西及亞倫照上主對摩西的命令，點算哥轄宗族佇會幕當職作工的人的人數。

38 革順的後代，照宗族及家族，點算

39三十歲到五十歲佇會幕當職作工的人的人數，

40共兩千六百三十名。

41這是摩西及亞倫照上主對摩西的命令，點算革順宗族佇會幕當職作工的人的人數。

42 米拉利的後代，照宗族及家族點算

43三十歲到五十歲佇會幕當職作工的人的人數，

44共三千兩百名。

45這是摩西及亞倫照上主對摩西的命令，點算米拉利宗族的人數。

46 摩西、亞倫，及以色列會眾的首領，照宗族及家族點算利未人，

47三十歲到五十歲佇會幕當職做工，扛物件的人的人數，

48總共八千五百八十名。

49 摩西照上主的命令指派逐個人著辦的事務，著扛的物件。𪜶攏照上主對摩西的命令按呢登錄。