傳道書 8 - 現代台語譯本漢字版(TTVH)-闽南语

1啥人真正有智慧？啥人會曉解釋代誌？人的智慧互伊的面有光彩，嘛互伊兇惡的面改變。

守王的命令

2著守王的命令，因為你有指上帝宣誓。

3佇王的面前毋免驚，毋拘勢面若僫，著趕緊離開；因為伊愛做什麼就做什麼。

4王的話有權；啥人敢對伊講：你啲創什麼？

5守命令的人𣍐抵著災禍；智慧的人看清楚時勢，會曉判斷。

6雖然苦難重重硩佇人的身上，毋拘逐項事攏有伊適當的時及結局。

7伊毋知將來會發生什麼代誌；嘛無人會當給伊講將來會按怎。

8無人會當支配家己的性命，嘛無人有權決定伊死的日；此款生死的掙扎人𣍐當避免，罪惡嘛𣍐當救做歹的人。

邪惡的人及正直的人

9諸個我攏有看著，嘛專心查考日光的下面所發生一切的代誌；有時此個人管轄別人，結果害著家己。

10我看著歹人受著隆重的埋葬，送葬的人對墓地轉來，已經𣍐記得彼個人佇城內所做的歹代；這嘛是空虛。

11罪定了無隨時執行，世間人才會大膽做歹。

12罪人做歹一百遍，猶久食長歲壽，毋拘我確實知，驚畏上帝的人，因為心存敬畏，最後會得著福氣。

13總是歹人𣍐得著福氣，親像影真緊就無去，因為伊無敬畏上帝。

14佇世間閣有一項空虛的代誌，就是義人抵著歹人該受的報應，歹人得著義人應得的報賞；我講：這嘛是空虛。

15所以我鼓勵人享受快樂。因為人佇日光的下面亦食亦飲是上大的享樂。這是上帝互人佇日光的下面拍拼應該得著的享受。

16我專心追求智慧閣觀察世間所發生的代誌，甚至暝日攏無睏。

17我有看見上帝一切的作為，佇日光的下面所發生的代誌，人攏尋𣍐著發生的理由；人無論按怎抄尋都尋𣍐著；連有智慧的人，雖然想講伊知，嘛尋𣍐著。