馬可福音 2 - 現代台語譯本漢字版(TTVH)-闽南语

耶穌醫好半身不遂的人(太 9.1-8；路 5.17-26)

1幾日後，耶穌閣去迦百農，有消息傳講伊佇厝內，

2就有真多人聚集倚來，煞攏無空位，連門口都無。耶穌對𪜶啲講道的時，

3有四個人扛一個半身不遂的人來伊遐。

4因為人真多，𣍐當扛去到耶穌的面前，𪜶就佇伊頂面的厝頂拆一孔，互彼個半身不遂的人倒佇床舖縋落去。

5耶穌看見𪜶的信心，就對彼個半身不遂的人講：「少年人，你的罪赦免啦！」

6有幾若個經學教師坐佇遐，心內啲議論：

7「此個人哪會按呢講？伊啲褻瀆上帝！獨一的上帝以外，什麼人會當赦罪？」

8耶穌內心隨時知影𪜶按呢啲議論，就對𪜶講：「是按怎恁心內啲質問此個代誌？

9對半身不遂的人講『你的罪赦免啦』，抑是講『起來，夯你的床舖起來行』，叨一項較簡單？

10不過我欲互恁知人子佇地上有赦罪的權柄。」耶穌就對彼個半身不遂的人講：

11「我給你講，起來，夯你的床舖，轉去恁兜！」

12伊就起來，隨時夯伊的床舖，佇眾人的面前行出去。眾人攏大著驚，歸榮光互上帝講：「阮前到今毋曾看著此款代誌！」

耶穌呼召利未(太 9.9-13；路 5.27-32)

13耶穌閣去加利利湖邊，有一大陣人來伊遐，伊就給𪜶教示。

14耶穌經過的時看著亞勒腓的子利未坐佇稅關，就對伊講：「來隨我！」利未就起來隨耶穌。

15後來，耶穌佇利未𪜶兜食飯。有真多貿稅的及罪人嘛及耶穌以及伊的門徒做夥食飯，因為有真多人啲隨耶穌。

16一寡法利賽派的經學教師看著耶穌及罪人以及貿稅的做夥食飯，就對伊的門徒講：「是按怎伊及貿稅的以及罪人做夥食？」

17耶穌聽著就給𪜶講：「健康的無需要醫生，破病的才有需要。我來，毋是欲招義人，是欲招罪人。」

禁食的問題(太 9.14-17；路 5.33-39)

18 約翰的門徒及法利賽派的人啲禁食。有人來問耶穌：「約翰的門徒及法利賽派的門徒禁食，是按怎你的門徒無禁食？」

19耶穌應講：「新郎猶及婚宴的人客做夥的時，人客豈會禁食？𪜶猶及新郎做夥的時𣍐禁食。

20日子啲欲到，新郎會互人對𪜶中間掠去，彼時𪜶就會禁食。

21「無人用無勼水的布去補舊衫。若按呢做，彼塊新布會糾裂舊衫，顛倒破閣較大孔。

22嘛無人將新酒入佇舊皮袋。若按呢做，新酒會給皮袋爆破，酒流出來，皮袋嘛歹去。新酒應該入佇新皮袋！」

安歇日的問題(太 12.1-8；路 6.1-5)

23有一個安歇日，耶穌對麥園經過。伊的門徒那行那摘麥穗。

24法利賽派的人對耶穌講：「你看！𪜶是按怎佇安歇日做𣍐用得做的代誌？」

25耶穌給𪜶講：「恁豈毋曾讀著大闢及隨伊的人腹肚枵需要食物的時所做的代誌？

26亞比亞他做大祭司的時，大闢入去上帝的殿食獻祭的餅，嘛互隨伊的人食；此款餅祭司以外的人𣍐用得食。」

27耶穌給𪜶講：「安歇日是為著人來設立；人毋是為著安歇日來創造。

28所以，人子嘛是安歇日的主。」