以斯拉記 10 - 現代台語譯本漢字版(TTVH)-闽南语

禁止及外族通婚

1 以斯拉祈禱，認罪，啼哭，仆佇上帝聖殿頭前的時，有一大陣以色列的男女及囝仔聚集來伊遐；𪜶攏哭甲真傷心。

2以攔的後代，耶歇的子示迦尼對以斯拉講：「阮對咱的上帝無忠實，因為阮娶此所在外族的女子做某；雖然是按呢，以色列人猶久有向望。

3現在咱著及咱的上帝立約，照你及許個驚畏上帝的誡命的人所決定，照律法，將諸個某及𪜶所生的兒女攏趕出去。

4著採取行動，這是你應該做的事。阮欲支持你，你著勇敢去做。」

5 以斯拉就隨時互祭司的領袖及利未人，以及以色列眾人宣誓，欲照諸個話去做；𪜶就按呢宣誓。

6以斯拉對上帝聖殿的頭前起來，入去以利亞實的子約哈難的厝，住佇遐，無食無飲，為著流放倒來對上帝無忠實的人哀傷。

7𪜶佇耶路撒冷及猶大全地宣布，命令流放倒來的人攏著來耶路撒冷聚集。

8若有人無順趁許個首領及長老的命令，三日內無來，就欲沒收𪜶的財產，將𪜶對流放倒來的人的團體革出。

9猶大及便雅憫此兩支族的人就佇三日內攏來耶路撒冷聚集；彼日是九月二十，眾人攏坐佇上帝聖殿頭前的廣場，為著此個事，閣因為落大雨，攏㘈㘈惙。

10祭司以斯拉起來，給𪜶講：「恁對上帝無忠實，娶外邦的女子做某，加添以色列人的罪。

11今著向上主 — 恁列祖的上帝認罪，遵行伊的旨意，及在地的人民以及外族的女子隔離。」

12會眾攏大聲應講：「阮一定欲照你所講的去做。

13毋拘人真多，閣抵著大雨，阮無法度一直徛佇外面，閣這嘛毋是一日兩日會當解決的代誌，因為阮所犯的罪真嚴重。

14今，請咱的領袖代表全體會眾留佇遮，咱逐個城所有娶外邦女子做某的人，著照指定的時間，及彼個城的長老以及審判官做夥來，辦理諸個事，直到咱的上帝收回對咱的受氣。」

15毋拘亞撒黑的子約拿單、特瓦的子雅哈謝反對此個決定，𪜶嘛得著米書蘭及利未人沙比太的支持。

16對流放的地倒來的人照以斯拉的話去做。祭司以斯拉就對族長的中間指派一寡人，登記𪜶的名，對十月初一開始調查此個事。

17到正月初一，所有娶外族女子的人的名才調查清楚。

娶外族女子的人

18佇祭司的後代，查出有娶外族女子的人就是：約薩達的子耶書亞及伊的兄弟瑪西雅、以利以謝、雅立，及基大利。

19𪜶立誓欲離𪜶的某；因為𪜶有犯罪，就獻一隻綿羊贖𪜶的罪。

20 音麥的後代，有哈拿尼及西巴第雅

21 哈琳的後代，有瑪西雅、以利亞、示瑪雅、耶歇，及烏西亞

22 巴施戶珥的後代，有以利約乃、瑪西雅、以實瑪利、拿坦業、約撒拔，及以利亞薩

23 利未人的中間，有約撒拔、示每、基拉雅 (就是基利他)、比他希雅、猶大，及以利以謝

24負責唱歌的人的中間，有以利亞實

聖殿守衛的中間有沙龍、提鍊，及烏利

25 以色列人巴錄的後代中，有拉米、耶西雅、瑪基雅、米雅民、以利亞撒、瑪基雅，及比拿雅

26 以攔的後代中，有瑪他尼、撒迦利亞、耶歇、亞伯底、耶利摩，及以利亞

27 薩土的後代中，有以利約乃、以利亞實、瑪他尼、耶利摩、撒拔，及亞西撒。

28 比拜的後代中，有約哈難、哈拿尼雅、薩拜，及亞勒

29 巴尼的後代中，有米書蘭、瑪鹿、亞大雅、雅述、示押，及耶利摩

30 巴哈‧摩押的後代中，有阿底拿、基拉、比拿雅、瑪西雅、瑪他尼、比撒列、賓內，及瑪拿西

31 哈琳的後代中，有以利以謝、伊示雅、瑪基雅、示瑪雅、西緬、

32便雅憫、瑪鹿，及示瑪利雅

33 哈順的後代中，有瑪特乃、瑪達他、撒拔、以利法列、耶利買、瑪拿西，及示每

34 巴尼的後代中，有瑪玳、暗蘭、烏益、

35比拿雅、比底雅、基祿、

36瓦尼雅、米利末、以利亞實、

37瑪他尼、瑪特乃，及雅掃

38 賓內的後代中，有示每、

39示利米雅、拿單、亞大雅、

40瑪拿底拜、沙賽、沙賴、

41亞薩列、示利米雅、示瑪利雅、

42沙龍、亞瑪利雅，及約瑟

43 尼波的後代中，有耶利、瑪他提雅、撒拔、西比拿、雅玳、約珥、比拿雅。

44諸個人攏娶外族的女子做某；其中嘛有人對諸個女子生子查某子。