詩篇 76 - 現代台語譯本漢字版(TTVH)-闽南语

亞薩的詩，交互聖樂長；用弦樂伴奏。得勝的主上帝

1佇猶大，上帝人人攏識；

佇以色列，伊的名受尊做大。

2佇撒冷，有伊的會幕；

佇錫安，有伊徛起的所在。

3佇遐，伊遏折火的箭，

毀壞盾牌、刀劍，以及所有的武器。

4你的榮光及威嚴

贏過囤滿戰利品的山嶺。

5上勇的人攏受搶劫；

𪜶睏去無閣醒，

連戰士嘛𣍐當出手。

6 雅各的上帝啊，你一下責備，

戰車、戰馬攏倒落去，無閣起來。

7只有你通驚畏；

你的受氣一下發出，啥人佇你面前徛會牢？

8-9上帝啊，你起來審判，

欲救地上所有困苦的人；

你一下對天宣判，

地就驚惶毋敢出聲。

10人的受氣最後會變做對你的稱讚；

經過你受氣留落來的人會圍倚來敬拜你。

11著對上主 — 恁的上帝下願，嘛著謝願；

四圍的人著帶禮物獻互通敬畏的主。

12伊欲互驕傲的貴族漏氣；

伊欲互世上的列王驚畏。