以賽亞書 11 - 現代台語譯本漢字版(TTVH)-闽南语

和平的國度

1對耶西的老樹頭會茁芛，

對伊的根會發幼枝。

2上主的神欲及伊同在，

就是互伊有智慧及聰明的神，

有計劃及能力的神，

有智識及敬畏上主的神。

3敬畏上主是伊所意愛。

伊𣍐照目睭所看來審判，

嘛𣍐靠耳孔所聽來判斷。

4伊欲用公義維護散赤人，

用公平保障互人看無起的人。

伊欲用公正的裁決做棍摃迫害者，

發命令處死邪惡的人。

5伊欲用公義治理，

用信實統治。

6豺狼及綿羊會做夥住；

豹及山羊仔子做夥睏。

牛仔子及獅仔子鬥陣食；

細漢囝仔會做牧者看顧𪜶。

7牛母及熊母會做夥食；

𪜶的子會做陣歇睏。

獅會親像牛食草。

8食奶的嬰仔會佇毒蛇的孔口𨑨迌；

斷奶的囝仔會伸手入去毒蛇的穴。

9佇我聖山的逐所在，

一定無傷害，嘛無破壞；

因為對上主的認識普及全地，

親像水充滿大海。

流亡的人民回歸故鄉

10佇彼日，耶西的根會成做萬民的大旗徛在在。萬國攏會擁護伊。伊徛起的所在會充滿榮光燦爛。

11彼時，主會第二遍伸手對亞述、埃及、巴特羅、衣索匹亞、以攔、巴比倫、哈馬，以及沿海地區贖回所賰的子民倒轉來。

12主會向萬國𫞼大旗，對地的四方聚集四散的以色列人倚來，將受趕散的猶大人民聚集倒轉來。

13彼時，以色列的怨妒會消失，

猶大的敵視嘛會煞；

以色列𣍐閣怨妒猶大，

猶大嘛𣍐閣敵視以色列。

14𪜶會鬥陣衝落來攻擊西旁的非利士，

搶奪東旁的人民。

𪜶會征服以東及摩押的人民；

亞捫人會屈服佇𪜶腳下。

15上主會互埃及的海灣焦硞硞；

伊會攑高伊的手大力搧燒風，

互幼發拉底河變做七條焦溪，

人穿草鞋嘛會當行過。

16欲有一條大路為著上主所賰的子民備辦，

通互𪜶對亞述逃脫出來，

親像古早以色列人對埃及地出來像款。