1我作一個屬基督的人講實話，無白賊；我的良心受聖神感動給我作證：
2我非常憂傷，心內痛苦無停。
3我為著同胞，我的骨肉至親，本身若著受咒詛及基督隔開嘛甘願。
4𪜶是以色列人；上帝揀選𪜶做子兒，賜𪜶榮光、約、律法、禮儀，及應允。
5𪜶是族長的子孫；照血統，基督及𪜶同族。願超越萬物的上帝得著稱讚到萬世代。阿們！
6按呢毋是講上帝的應允無實現。因為毋是所有的以色列人攏是上帝的選民。
7亞伯拉罕的子孫嘛無攏是應允的子兒。上帝曾對亞伯拉罕講：「對以撒生的才通算做你的子孫。」
8按呢是講血統的子兒無一定是上帝的子兒；只有對上帝的應允生的才算是上帝的子孫。
9因為應允的話是按呢講：「時機到，我會閣來，莎拉會生一個查甫子。」
10毋若按呢，麗百加的雙生子嘛是對仝一個人，就是咱的祖先以撒來懷孕。
11-12毋拘為著欲表示上帝確實根據家己的目的來揀選人，伊對麗百加講：「大的會服事細的。」此句話是佇𪜶猶未出世，猶未做好抑是做歹以前，上帝所講的。按呢，上帝的揀選毋是根據人的行為，是根據伊家己的選召。
13照聖經記載：「雅各，我合意；以掃，我無合意。」
14按呢，咱欲講什麼？上帝無公道是無？絕對毋是！
15伊曾對摩西講：
我欲憐憫我愛憐憫的人；
我欲體貼我愛體貼的人。
16所以，上帝的揀選毋是根據人的意願抑是勞力，是出佇伊的憐憫。
17聖經記載上帝有對法老講：「我設立你作王，目的是欲用你來顯明我的權能，互我的名傳到全世界。」
18所以，上帝欲憐憫什麼人就給伊憐憫，欲互什麼人心硬就互伊心硬。
上帝的受氣及憐憫19按呢，你會給我問：「既然是按呢，是按怎上帝猶啲責備人？什麼人會當反抗上帝的旨意？」
20你此個人，你算啥，敢給上帝抵嘴！受塑造的物豈會對塑造的講：「你是按怎給我造甲按呢？」
21燒瓷的豈無權通用仝一塊黏土照家己的意思造一個貴氣的器具，一個粗俗的器具？
22雖然上帝欲表示伊的受氣互人知伊的權能，猶久用真大的寬容吞忍許個惹伊受氣應該滅亡的人。
23伊為著所預備來接受伊的榮光許個人，就是伊憐憫的對象，伊閣較會互𪜶知伊豐富的榮光。
24咱攏是伊所呼召的，毋若對猶太人，嘛對外邦人中間呼召。
25照伊佇何西阿書所講：
本來毋是我的子民的，
我欲稱呼𪜶做「我的子民」。
本來毋是我所疼的，
我欲互𪜶做「我所疼的」。
26佇彼個所在，我曾對𪜶講「恁毋是我的子民」；
像款佇遐，𪜶會叫做「永活上帝的子兒」。
27關係以色列人，以賽亞曾宣布講：「雖然以色列的子孫親像海沙赫呢多，毋拘只有所賰的少數會得著救，
28因為主佇地上會真緊閣徹底執行審判。」
29這是照以賽亞以前所講：
若毋是主 — 萬軍的統帥給咱留種，
咱早就親像所多瑪，
嘛親像蛾摩拉。
以色列人及福音30按呢，咱欲講什麼？外邦人無追求及上帝建立合宜的關係，卻對信及上帝有合宜的關係。
31以色列人追求對律法互上帝認定𪜶做義人，反轉無得著。
32哪會按呢？因為𪜶毋是對信，是對靠行為。𪜶去踢著彼塊互人跋倒的石跋倒。
33聖經有按呢記載：
看咧，我將互人跋倒的石，
互人跋倒的大石囥佇錫安；
信伊的人𣍐致到失望。
Who We AreWhat We EelieveWhat We Do
2025 by iamachristian.org,Inc All rights reserved.
