詩篇 43 - 現代台語譯本漢字版(TTVH)-闽南语

流亡者的祈禱

1上帝啊，求你主持公道，

對無敬畏你的國替我申冤；

求你救我脫離奸詐不義的人。

2你是我的上帝，我的堡壘；

你是按怎放拺我？

我是按怎著因為對敵的壓迫悲傷行來行去？

3求你顯出你的光及真實來引導我，

導我去你的聖山，到你的會幕。

4我就來上帝的祭壇，

到我極大歡喜的上帝遐。

上帝，我的上帝啊，我欲彈琴稱讚你。

5我的心啊，你是按怎鬱卒，

是按怎佇我內面哼哼呻？

著仰望上帝；

我猶久欲稱讚伊，

因為伊是我的拯救者，我的上帝。