1有人給約押講：「王為著押沙龍啼哭悲哀。」
2彼日的勝利變做全軍的悲哀，因為彼日軍兵有聽講王為著伊的子哀傷。
3彼日軍兵偷偷仔入城，親像戰敗逃走見笑的兵士仝款。
4王罩伊的面，大聲哮，講：「我的子押沙龍啊！押沙龍，我的子，我的子啊！」
5 約押入王住的所在去見王，講：「你今仔日互你所有的人臣無體面。𪜶今仔日救你的性命，救你的子及查某子，閣救你的后妃及嬪妃的性命。
6怨恨你的，你疼𪜶；疼你的，你怨恨𪜶。你今仔日明明表示你無看許個將領及部下做要緊。我今仔日看出，若押沙龍活啲，阮攏死，你顛倒歡喜。
7今你著起來出去安慰你的部下。我指上主咒誓，你若無出去，今暝無一個人會及你做夥，陪伴你；此個災禍比你對少年到現在抵著的閣較嚴重。」
8王就起來，坐佇城門口；有人給軍兵講：「恁看，王坐佇城門口。」軍兵就攏來到王的面前。
大闢倒去耶路撒冷以色列人已經逃走，逐個人倒去𪜶兜。
9以色列逐支族的人紛紛議論，講：「大闢王曾解救咱脫離對敵的迫害，閣解放咱脫離非利士人的壓迫；伊因為閃避押沙龍猶佇外面逃亡。
10咱有選立押沙龍作王治理咱，伊已經陣亡。恁哪佯恬恬，毋請王倒來？」
11 大闢王派人去見祭司撒督及亞比亞他，講：「恁著給猶大的長老講：『王已經有聽著以色列眾人欲請王轉來王宮；恁哪猶未欲請王倒來？
12恁是我的兄弟，我的骨肉；請王倒來此個代誌，恁是按怎隨人𣍐著？』
13恁嘛著給亞瑪撒講：『你豈毋是我的骨肉？我欲互你對現在起代替約押做元帥，若無，願上帝加倍責罰我。』」
14按呢，大闢就得著猶大眾人的心；𪜶攏同心親像一個人。𪜶就差人去見王，講：「請你及你的眾人臣倒來。」
15王就起身倒去。伊到約旦河的時，猶大人來吉甲迎接伊，導伊過河。
16巴戶琳的便雅憫人，基拉的子示每趕緊及猶大人落來迎接大闢王。
17及伊來的，有一千個便雅憫人，有掃羅家的僕人洗巴，及伊十五個子、二十個僕人，𪜶攏趕緊過約旦河去見王。
18有人照王的意思，用船護送王的家眷過河。
大闢赦免示每王啲欲過河的時，基拉的子示每來仆佇王的面前，
19對王講：「我的主我的王離開耶路撒冷的時，你的僕人有背逆你；今求我的主毋通追究我的罪。請王毋通將此個代誌記牢牢，囥佇你的心內。
20你的僕人明明知家己有罪，所以今仔日約瑟全家我第一代先落來迎接我的主我的王。」
21 洗璐雅的子亞比篩講：「示每曾咒詛上主所抹油選立的，豈毋免互伊死？」
22 大闢講：「洗璐雅的子，這毋是恁的代誌，我來處理就好；恁毋通反對。今仔日以色列中豈通有人受處死？我豈毋知此陣啲做以色列的王的是我？」
23王就給示每講：「你毋免死。」王對伊咒誓。
大闢恩待米非波設24 掃羅的孫米非波設嘛落去迎接王；伊對王離開的日到王平安倒來，無洗腳，無修嘴鬚，嘛無洗衫。
25伊佇耶路撒冷迎接王的時，王問伊：「米非波設，你哪無及我做夥去？」
26伊應講：「我的主我的王啊，彼陣你的僕人有準備驢，想欲及王做夥去，毋拘我是跛腳。我的僕人洗巴騙我，
27閣佇我的主我的王面前誹謗我。我的主我的王親像上帝的使者，請王照你看做好的對待我。
28我的父全家，佇我的主我的王面前攏該死；毋拘王猶互你的僕人及王做夥食，我哪有權通閣對王請求什麼？」
29王給伊講：「你毋免閣講你的代誌。我決定，你及洗巴平分許個土地。」
30 米非波設對王講：「我的主我的王已經平安倒來宮內，許個土地攏互洗巴嘛無要緊。」
大闢恩待巴西萊31 基列人巴西萊對羅基琳落來，欲護送王過約旦河。
32巴西萊是八十歲的老人。伊真好額；王住佇瑪哈念的時，伊有用食物供給王。
33王對巴西萊講：「請你及我做夥過去，及我住耶路撒冷，我欲照顧你。」
34 巴西萊對王講：「我猶有幾年通活，通及王做夥住耶路撒冷？
35我已經八十歲，已經𣍐曉分別媠僫，啖𣍐出食物的滋味，聽𣍐出男女唱歌的聲音。僕人哪通拖累我的主我的王。
36你的僕人只有陪伴王過約旦河一塊仔路；王哪著按呢恩待我？
37求你准你的僕人倒去，互我通死佇我的故鄉，安葬佇我的父母的墓遐。今你的僕人金罕佇遮；請我的主我的王互伊及你做夥過去，照你所看做好的對待伊。」
38王講：「金罕通及我去；我會照你所向望的款待伊；你對我請求的，我給你答應。」
39所有的人攏過約旦河，王嘛過去。王給巴西萊唚，給伊祝福；伊就倒去伊的故鄉。
40王過河，到吉甲；金罕嘛及伊過去；猶大攏總的軍兵及以色列一半的軍兵，嘛攏護送王過去。
猶大及以色列起爭論41後來，以色列人民來見王，給伊講：「阮的兄弟猶大人是按怎偷偷仔給你接去，導王及你的家屬，以及跟隨你的人，過約旦河？」
42猶大眾人應以色列人，講：「王及阮是仝支族，恁是按怎為著此個事啲受氣？阮豈曾對王得著什麼好處？王豈曾互阮什麼利益？」
43 以色列人應猶大人講：「十二支族中，阮有十支族，阮及大闢王比恁較有關係。恁是按怎看輕阮？豈毋是阮先講欲導王倒來？」
總是，猶大人的話比以色列人的話較硬。
Who We AreWhat We EelieveWhat We Do
2025 by iamachristian.org,Inc All rights reserved.
