詩篇 17 - 現代台語譯本漢字版(TTVH)-闽南语

大闢的祈禱。無辜的人的祈禱

1上主啊，求你聽公道的訴求，

留心聽我的祈禱。

我無用奸詐的嘴唇祈禱，

求你俯耳孔來聽。

2求你用目睭看出是非；

求你判我無罪。

3你有考驗我的心，連暝時嘛監察我；

你用火鍛鍊我，無尋著什麼歹。

我立志無互我的嘴有過失。

4我遵趁你所講的話，無親像別人的行做；

我謹慎無行強暴的人的路。

5我的腳一直行你的路，

毋曾偏離。

6上帝啊，我求叫你，因為你會應我；

求你俯耳孔聽我的祈禱。

7求你顯出你奇妙不變的疼，

用正手救倚靠你的人脫離𪜶的對敵。

8求你保護我，親像保護目睭仁，

遮蓋我佇你翼下。

9求你互我脫離搶劫我的歹人，

脫離圍困我欲害我性命的對敵。

10𪜶塞密憐憫的心；

𪜶的嘴講驕傲自大的話。

11𪜶追趇我，現在圍困我；

𪜶直直相欲給我摔倒佇土腳。

12𪜶親像獅數想欲拆碎我，

親像猛獅埋伏啲當等。

13上主啊，求你起來對付我的對敵，互𪜶屈服，

用你的刀救我的性命脫離歹人。

14上主啊，求你用你的手救我脫離世間人，

脫離佇現世享樂的世間人。

你用你的財物脹滿𪜶的腹肚，

連𪜶的子兒嘛脹甲飽飽，

閣有賰，通留互𪜶的子孫。

15若是我，我會看見你的面，因為我的行為正直；

我睏醒的時，你的臨在會互我滿足。