1上主閣互我看著大祭司耶書亞徛佇上主的使者面前，撒旦徛佇耶書亞的正旁欲給伊控告。
2上主對撒旦講：「撒旦，上主給你責備！揀選耶路撒冷的上主責備你！此個人豈毋是對火中抽出來的一塊柴？」
3耶書亞穿垃屑的衫，徛佇使者的面前。
4使者給許個啲侍候的講：「給伊的垃屑衫褪起來。」上主給耶書亞講：「我已經除去你的罪惡，我欲給你穿禮服。」
5上主吩咐著用清氣的禮帽給伊戴佇頭殼。𪜶就給伊穿禮服，戴清氣的禮帽；彼時上主的使者徛佇邊仔啲看。
6上主的使者警戒耶書亞講：
7「上主 — 萬軍的統帥按呢講：『你若遵行我的道路，遵守我的命令，就會當管理我的殿，顧守我的埕；我嘛欲互你佇許個侍候者中間自由出入。
8大祭司耶書亞，你及坐佇你面前的祭司伴攏著聽；諸個人是將來欲發生的代誌的兆頭，我欲互新芛，就是我所揀選的王來臨。
9你看，我佇耶書亞面前下一塊有七蕊目睭的石。』上主 — 萬軍的統帥講：『看咧，我欲佇彼塊石頂面刻字作證，欲佇一日內擦消此個地的罪。
10佇彼日，恁逐個人會請厝邊來葡萄樹腳及無花果樹腳坐。』上主 — 萬軍的統帥按呢宣布。」
Who We AreWhat We EelieveWhat We Do
2025 by iamachristian.org,Inc All rights reserved.
