申命記 5 - 現代台語譯本漢字版(TTVH)-闽南语

十條誡(出 20.1-17)

1 摩西召集以色列人，對𪜶講：

以色列啊，著注意聽我今仔日給恁吩咐的規例及命令，恁著學習，切實遵行。

2上主 — 咱的上帝佇何烈山及咱立約。

3此個約，上主毋是及咱的列祖立的，是及今仔日咱所有猶活啲，徛佇遮的人立的。

4上主佇山頂，對火中面對面及恁講話。

5彼時我徛佇上主及恁的中間，欲將上主的話傳互恁，因為恁驚彼個火，毋敢上山。上主講：

6「我是上主 — 你的上帝，有將你對埃及地，做奴才的家導出來。

7「我以外你毋通有別個上帝。

8「毋通為家己雕刻偶像，無論天頂、地上，及地下水內所有的物，攏毋通造𪜶的像；

9毋通給𪜶跪拜，嘛毋通服事𪜶，因為我上主 — 你的上帝是要求全情服事的上帝；怨恨我的人，我追究𪜶的罪，對父到子，到三四代；

10疼我，遵守我誡命的人，我施恩互𪜶，直到千代。

11「毋通濫用上主 — 你的上帝的名；因為濫用上主的名的人，我上主一定無給伊當做無罪。

12「著照上主 — 你的上帝的命令，守安歇日做聖日。

13六日內著拍拼做你所有的工課，

14毋拘第七日是上主 — 你的上帝設立的安歇日；此日，你及你的子、查某子、奴僕、女婢、牛、驢、牲生，以及寄居佇恁中間的人，攏毋通做工，互你的奴僕、女婢，通及你像款安歇。

15著會記得，恁以前曾佇埃及地做奴才，上主 — 恁的上帝伸出大氣力的手，導恁對遐出來；因為按呢，上主 — 恁的上帝命令恁著守安歇日。

16「著照上主 — 你的上帝的命令，孝敬你的老父、你的老母，通互你佇上主 — 你的上帝賞賜你的地久長徛起，享受福氣。

17「毋通害死人。

18「毋通姦淫。

19「毋通偷提。

20「毋通作偽證陷害你的厝邊。

21「毋通貪你的厝邊的某，嘛毋通貪你的厝邊的厝、田園、奴僕、女婢、牛、驢，抑是你的厝邊任何的物件。」

22諸個是上主佇山頂，對火焰、密雲、烏暗的中間，大聲對恁全體會眾頒布的誡命，無閣加添其他的話。伊閣將諸個誡命寫佇兩塊石版，交互我。

摩西傳達律法(出 20.18-21)

23彼時，山裡有火啲𤏸，恁聽見有聲對烏暗中出來，恁逐支族的領袖及長老攏來我遮。

24恁講：「你看，上主 — 阮的上帝互阮看見伊的榮光及偉大；阮閣聽見伊的聲對火中發出；今仔日阮才知，上帝對人講話，人猶會活。

25此個大火會給阮燒死；阮若閣聽見上主 — 阮的上帝的聲，一定會死，阮哪著冒性命的危險？

26豈有人親像阮聽見永活上帝對火中講話的聲，猶會當活啲？

27你著進前去聽上主 — 阮的上帝所有欲對阮講的話；將上主對你講的話，攏給阮講；阮欲聽，嘛欲實行。」

28恁對我講的話，上主攏有聽著。伊對我講：「我有聽著諸個人對你講的話；𪜶講了真著。

29向望𪜶存此款心，敬畏我，常常守我的誡命，互𪜶及𪜶的子孫永遠得著福氣。

30你去給𪜶講：『恁倒去家己的布棚。』

31摩西，你著徛𫢶我遮，我欲將你所著教示𪜶的誡命、規例、命令攏給你講，互𪜶通佇我賞賜𪜶做產業的地實行。」

32所以，恁著切實遵行上主 — 恁的上帝的命令，毋通偏左偏右。

33恁攏著行上主 — 恁的上帝命令恁的路，互恁佇欲去佔領的地享受福氣，久長徛起。