1彼時，約書亞召集呂便支族、迦得支族，及瑪拿西半支族的人，
2對𪜶講：「上主的僕人摩西命令恁的，恁攏有遵守；我命令恁的，恁嘛有聽趁。
3一直到今仔日，恁即呢久攏無放拺恁的同胞；恁有遵守上主 — 恁的上帝所命令恁的。
4今上主 — 恁的上帝有照伊的應允，互恁的同胞享受太平；現在恁通倒轉去恁兜，轉去上主的僕人摩西佇約旦河東旁賜互恁做家業的地。
5毋拘恁一定著謹慎，遵行上主的僕人摩西所命令恁的誡命及律法，疼上主 — 恁的上帝，行伊一切的道路，守伊的誡命，忠誠無離開伊，全心全意服事伊。」
6約書亞給𪜶祝福，送𪜶去；𪜶就倒去𪜶兜。
7 瑪拿西半支族已經佇巴珊對摩西分著家業；另外半支族，佇約旦河西旁及𪜶的兄弟做夥對約書亞分著家業。約書亞送𪜶倒去的時，給𪜶祝福，
8吩咐𪜶講：「恁著將搶著的戰利品，就是真多的牲生、金、銀、銅、鐵，及非常多的衣服，提倒去恁兜，分互恁的同胞。」
9對按呢，呂便支族、迦得支族，及瑪拿西半支族的人，就對迦南地的示羅出發，及其他的以色列人相辭，倒去𪜶得著的基列地；就是摩西照上主的命令，分互𪜶做家業的地。
佇約旦河河邊起祭壇10 呂便人、迦得人，及瑪拿西半支族的人，佇迦南地的約旦河地區，倚近河的所在，起一座大閣顯目的祭壇。
11以色列人聽見呂便人、迦得人，及瑪拿西半支族的人佇迦南地對面約旦河邊，以色列邊界，起一座祭壇，
12以色列全會眾就佇示羅聚集，欲去給𪜶攻打。
13 以色列人派祭司以利亞撒的子非尼哈去基列地呂便人、迦得人，及瑪拿西半支族的人遐；
14及伊做夥去的有十個支族的領袖，𪜶嘛是以色列逐宗族逐家族的序大。
15𪜶到基列地，見呂便人、迦得人，及瑪拿西半支族的人，對𪜶講：
16「上主的全會眾按呢講：『恁是按怎背叛以色列的上帝？今仔日恁越頭無隨上主，為家己起一座祭壇，背逆上主，犯即大的罪！
17以前咱佇比珥犯罪，瘟疫臨到上主的會眾，到今仔日猶未潔淨，咱猶看做無要緊是無？
18恁竟然越頭無隨上主！恁今仔日背逆伊，明仔載伊會對以色列全會眾發大受氣。
19恁若想講所得著做家業的地無清氣，通過來上主的地，就是有上主會幕的所在，就會佇阮中間得著家業；總是毋通背逆上主，嘛毋通背叛阮，毋通佇上主 — 咱的上帝的祭壇以外，閣為家己起祭壇。
20以前謝拉的乾仔孫亞干豈毋是佇彼個應該毀滅的物犯罪，上主的受氣就臨到以色列全會眾？因為伊犯罪，死的人毋是干焦伊一個人。』」
21 呂便人、迦得人、瑪拿西半支族的人應以色列宗族的序大講：
22「大權能的主上帝！大權能的主上帝！伊知，願以色列人嘛知，阮若有背叛抑是背逆上主，今仔日就互阮死。
23阮若為家己起祭壇，越頭無隨上主，抑是佇壇頂獻燒化祭、素祭、平安祭，願上主給阮刑罰。
24毋拘毋是按呢！阮做此個代誌是驚了有一日，恁的後代對阮的後代講：『恁及上主 — 以色列的上帝有什麼關係？
25上主設此個約旦河做恁及阮中間的隔界；呂便人、迦得人，恁無權通做上主的子民。』按呢，恁的子孫會害阮的子孫無閣敬畏上主。
26所以，阮就決定欲為家己起一座祭壇，毋是為著獻燒化祭抑是其他的祭；
27是為著欲佇恁及阮，以及恁的後代及阮的後代中間做證據，阮通佇上主的會幕獻燒化祭、平安祭，及別款的祭來服事伊；才免恁的子孫將來對阮的子孫講：『恁無權通做上主的子民。』
28所以阮講：『將來𪜶若對阮抑是阮的後代按呢講，阮通應講：恁看阮列祖起的祭壇及上主的祭壇形體完全仝款；毋是為著欲獻燒化祭及其他的祭，是為著欲做恁阮中間的證據。』
29今仔日，阮絕對無此個意思，欲佇上主 — 咱的上帝會幕頭前的祭壇以外，閣另外起一座祭壇獻燒化祭、素祭，及其他的祭，來背逆上主，越頭無順趁伊。」
30祭司非尼哈及會眾的領袖，以及及伊做夥去許個以色列宗族的序大，聽著呂便人、迦得人，及瑪拿西人所講的話，就攏真滿意。
31祭司以利亞撒的子非尼哈對呂便人、迦得人，及瑪拿西人講：「今仔日，阮知上主及咱同在，因為恁無犯此個背逆的罪來得罪伊；恁實在有救以色列人脫離上主的刑罰。」
32祭司以利亞撒的子非尼哈及許個領袖，離開基列地區的呂便人、迦得人，倒去迦南地以色列人遐，給𪜶報告此個事。
33以色列人攏真滿意，就稱讚上帝，無閣提起欲攻打呂便人及迦得人，毀壞𪜶徛起的地。
34呂便人及迦得人就給此個祭壇叫做「見證的壇」，是講：「此個壇佇咱中間見證上主是上帝。」
Who We AreWhat We EelieveWhat We Do
2025 by iamachristian.org,Inc All rights reserved.
