傳道書 11 - 現代台語譯本漢字版(TTVH)-闽南语

有智慧的人的作為

1將你的米糧囥佇水面互伊流去，過一段時間會閣得著。

2將產業分做七份抑是八份，因為毋知將來有什麼災難。

3雲若有水氣滿滿，雨就摒落地；樹若倒向南抑是向北，倒佇什麼所在，就定定佇遐。

4看風勢的人𣍐去撒種；觀察天色的人𣍐去收割。

5性命的活氣按怎佇老母的子宮成做形體，你毋知；創造萬物的上帝的作為，你嘛毋知。

6早起時著撒種，到下昏時手嘛毋通停；因為你毋知會結實的是此個抑是彼個；抑是兩個攏會結實。

7光實在真好；目睭看著日頭真歡喜。

8人活偌久，著快樂赫久；毋拘嘛著記得烏暗的日子，因為烏暗的日子會真久。欲發生的事攏是空虛。

對少年人的勸告

9少年人啊，著佇年輕的時歡喜快樂；佇少年的日，照心所意愛，目睭所看見的去做；總是著知，為著這一切，你著對上帝負責。

10著將操煩對你的心掃除，痛苦對身軀除去；因為青春無久長，攏是空虛。