利未記 24 - 現代台語譯本漢字版(TTVH)-闽南语

燈台的條例(出 27.20-21)

1上主對摩西講：

2你著吩咐以色列人帶純的橄欖油來交互你，通點𤏸會幕內的燈，互燈不時點啲。

3對下昏到早起，亞倫著佇上主的面前，將會幕內面約櫃前的帳簾外的燈點互𤏸；這欲做恁世世代代永遠的規例。

4亞倫著佇上主的面前，常常照顧管理純金燈台頂面的燈火。

獻祭的餅的條例

5你著用幼麵粉烘十二塊餅，逐塊兩公斤。

6著將餅排做兩綴，每綴六塊，排佇上主面前純金的桌頂面。

7閣著用純的乳香糝佇逐綴餅的頂面，代表用火燒獻互上主的禮物。

8逐個安歇日，亞倫著將諸個餅排佇上主的面前，毋通閬暫；這是以色列人永遠著守的約。

9諸個餅著歸互亞倫及伊的子孫。𪜶著佇會幕的埕食，因為這是用火燒獻互上主的祭物中間至聖的部份，做祭司永遠得著的份額。

公正的判例

10-11有一個人，伊的老父是埃及人，老母是以色列人，是但支族底伯利的查某子示羅密。有一日，伊佇營內及一個以色列人冤家，褻瀆閣咒詛上主的名。有人給伊帶去摩西遐。

12𪜶給伊關起來，聽候上主指示。

13上主對摩西講：

14「著將彼個人帶去營外，互聽著伊咒詛的人按手佇伊的頭殼頂，見證伊有罪；全會眾著用石頭給伊抌死。

15你著對以色列人宣布：若有人咒詛上帝，著對家己的罪負責任。

16若有人褻瀆上主的名，無論是在地人抑是外族人，一定著互伊死；全會眾著用石頭給伊抌死。

17「若有人拍死人，一定著互伊死。

18若拍死牲生，著賠牲生，用命賠命。

19「若有人傷害同胞，伊按怎給人傷害，嘛著按呢對待伊：

20用傷賠傷，用目睭賠目睭，用嘴齒賠嘴齒；伊按怎給人傷害，就按呢辦伊。

21拍死牲生的，著賠牲生；拍死人的，一定著互伊死。

22無論是外族人抑是在地人，攏著照仝款的法律處理。我是上主 — 恁的上帝。」

23 摩西就給以色列人講，𪜶就將彼個咒詛上主的人帶去營外，用石頭給伊抌死。以色列人照上主命令摩西的話去做。