以賽亞書 35 - 現代台語譯本漢字版(TTVH)-闽南语

受救贖的子民歸回錫安

1曠野及焦燥的地欲歡喜，

沙漠欲快樂，

親像玫瑰開花。

2玫瑰欲開花茂盛，

欲歡喜歡呼。

伊欲有黎巴嫩的榮光，

欲得著迦密及沙崙的光彩。

𪜶會看見上主的榮耀，

見著咱上帝的光彩。

3著互軟弱的手堅強，

互無力的腳頭窩徛在。

4心肝驚惶的人，恁著對𪜶講：

「著堅強，毋免驚！

恁看，恁的上帝欲來申冤；

上帝一定會施行報應來拯救恁。」

5彼時，失明的人目睭會看見；

失聰的人耳孔會聽見。

6腳跛的人會親像鹿趒跳；

𣍐講話的人會歡喜唱歌。

荒埔欲有水淐出；

沙漠欲有江河啲流。

7炎熱的沙地會變做水池；

焦燥的土地會變做泉源。

豺狼住的所在

會發青草、蘆葦，及蒲草。

8佇遐欲有一條大路，

人給伊叫做「聖路」。

無清氣的人攏𣍐當對遐經過；

彼條路是為著上帝的子民造的；

行彼條路的，連戇人都𣍐迷路。

9佇遐無獅，

兇猛的野獸嘛𣍐出現。

佇遐人𣍐抵著野獸；

只有受救贖的人會行彼條路。

10上主贖回的人會倒轉來，

唱歌來到錫安；

永遠的喜樂會做𪜶的花冠。

𪜶會歡喜快樂，

無閣有悲傷吐氣。