羅馬書 3 - 現代台語譯本漢字版(TTVH)-闽南语

1按呢講，作猶太人有什麼優點？割禮有什麼利益？

2佇逐方面攏有真多好處。第一，上帝有將伊的話交託𪜶。

3𪜶中間若有人無信實，𪜶的無信實豈會互上帝的信實變做無效？

4絕對𣍐！甚至所有的人攏白賊，上帝亦一定是真實。照聖經所記載：

你責備的時，顯出公義；

你受控告的時，會勝訴。

5不過，咱的不義若會當顯明上帝的義，咱會當講什麼？我照人的想法講，上帝對咱受氣是不義是無？

6絕對毋是！若是，上帝哪會當審判世間？

7我的虛假若會當互上帝的真實閣較明顯，互伊閣較有榮光，我哪猶互伊宣判做罪人？

8按呢，哪毋講「咱來做歹互好事實現」？確實有人按呢講來給我中傷，𪜶應該受定罪。

無義人

9若按呢，咱猶太人豈有較贏外邦人？無！我已經有指責猶太人及外邦人攏受罪管轄。

10抵照聖經所記載：

攏無義人，

連一個都無！

11無曉悟的人；

攏無人尋求上帝。

12人攏背叛上帝，

攏行迷路；

攏無人做好事，

連一個都無！

13𪜶的嚨喉親像開開的墓；

𪜶的嘴舌奸詐；

𪜶的嘴唇有毒蛇的毒。

14𪜶嘴內充滿惡毒咒詛。

15𪜶走真緊，急欲刣人流血；

16𪜶走過的路攏有毀滅悲慘。

17平安的路𪜶毋識，

18對上帝，心無存敬畏。

19今咱了解，律法一切的要求是對佇律法下的人講的，互人攏𣍐當辯解，互全世界攏受上帝審判。

20所以無人靠守律法的條文會互上帝宣判做義人；對律法，人才知什麼是罪。

上帝互人及伊有合宜的關係

21現在，上帝已經給咱指示，咱毋免靠律法會當及伊建立合宜的關係；律法及先知攏為著這做見證。

22及上帝建立合宜的關係是通過信耶穌基督。上帝按呢對待所有信基督的人，攏無差別。

23因為所有的人攏犯罪，致到上帝的榮光得𣍐著；

24不過，對上帝所賜白白的恩典，通過基督耶穌完成的救贖，人通及上帝有合宜的關係。

25上帝立耶穌作贖罪祭，通過伊的死，互人對信來得著赦罪。上帝用按呢來顯明伊的義。佇過去，伊用耐心對待人，寬容𪜶以前所犯的罪，

26欲佇現今此個時顯明伊家己是義，閣互信耶穌的人及伊有合宜的關係。

27若按呢，咱猶有什麼通誇口？攏無！靠什麼法則？靠行為是無？毋是！是靠信的法則。

28所以，阮認定，人及上帝建立合宜的關係，毋是靠守律法的行為，只有對信。

29上帝豈只有是猶太人的上帝？伊豈毋是外邦人的上帝？是，伊嘛是外邦人的上帝。

30既然上帝只有一位，伊互受割禮的猶太人對信來及伊建立合宜的關係，嘛互無受割禮的外邦人對信來及伊建立合宜的關係。

31按呢講，咱因為此個信煞互律法失去效力是無？絕對毋是！咱顛倒是啲確立律法。