約書亞記 20 - 現代台語譯本漢字版(TTVH)-闽南语

設立避難城(民 35.9-28；申 19.1-13)

1上主吩咐約書亞講：

2「著命令以色列人，照我通過摩西給恁講的，為恁家己設立避難城，

3互無意中誤殺人的通走去遐。許個城通做恁閃避報冤仇的人的所在。

4誤殺人的通走去許個城，徛佇城門口，將伊的事情講互彼個城的長老聽；𪜶就通接伊入城，互伊一個所在，住佇𪜶中間。

5報冤仇的人若趇到彼個城，城內的人𣍐用得將刣死人的交出去；因為伊是無意中刣死人，及死去的人無冤仇。

6伊著住佇彼個城，佇會眾的面前受審判。到彼時的大祭司死，伊才通倒去伊走出來的本城本家。」

7𪜶就決定設立避難城佇拿弗他利山區加利利的基低斯，及佇以法蓮山區的示劍，以及佇猶大山區的基列‧亞巴，就是希伯崙。

8閣佇約旦河東旁設立避難城，佇耶利哥東旁屬呂便支族的曠野平原的比悉，及屬迦得支族基列的拉末，以及屬瑪拿西支族巴珊的戈蘭。

9諸個是為著以色列眾人，及住佇𪜶中間的外族人設立的避難城，互無意中誤殺人的攏通走去遐，免互報冤仇的人刣死，聽候伊公開受審判。