以西結書 10 - 現代台語譯本漢字版(TTVH)-闽南语

上主的榮光離開聖殿

1我觀看，看見佇天使基路伯頭殼頂的穹蒼頂面，有一個形狀親像用藍寶石造的寶座。

2上帝對穿幼麻布的衫彼個人講：「你入去，對基路伯下面的輪仔的中央，提啲𤏸的火炭出來，捧佇雙手，撒佇全耶路撒冷城。」

我看伊入去。

3伊入去的時，基路伯徛佇聖殿的南旁，有雲彩充滿內埕。

4上主的榮光升高離開基路伯，停佇聖殿的入口；有雲彩充滿聖殿，上主的榮光發出的光輝充滿歸個埕。

5基路伯的翼發出的聲，親像全能上帝啲講話的聲，佇外埕嘛聽會著。

6上主吩咐穿幼麻布的衫彼個人對基路伯下面輪仔的中央提火；伊就入去，徛佇一個輪仔的邊仔。

7其中一個基路伯伸手對基路伯中央提一寡火，下佇穿幼麻布的衫彼個人的手中。彼個人提著就出去。

8許個基路伯的翼股下面有手，看起來親像人的手。

9我看見諸個基路伯的邊仔有四個輪仔，每一個基路伯邊仔攏有一個輪仔；輪仔親像寶石發光。

10四個輪仔的外形攏仝款；每一個輪仔親像內面閣有一個輪仔。

11此四個輪仔振動的時，攏會當對逐旁直行，毋免轉斡。𪜶向叨一個方向行，攏毋免轉斡。

12基路伯歸身軀，連尻脊、手、翼，甚至每一個輪仔，四周圍攏是目睭。

13諸個輪仔，照我聽見的叫做「啲轉的輪仔」。

14每一個基路伯攏有四款面：第一個是牛的面，第二個是人的面，第三個是獅的面，第四個是鷹的面。

15基路伯飛上高；諸個是我佇迦巴魯河邊看見的活物。

16基路伯行的時，輪仔嘛佇邊仔行。𪜶搋開翼飛高離開地面，輪仔嘛無轉踅離開𪜶身邊。

17基路伯停啲，輪仔嘛停啲；基路伯對地面升高，輪仔嘛做夥升高，因為活物的心意控制輪仔。

18上主的榮光離開聖殿的入口，停佇基路伯的頂面。

19我看見基路伯搋翼飛高離開地面，輪仔嘛佇𪜶身邊。𪜶停佇聖殿東門的入口，以色列上帝的榮光佇𪜶頂面。

20諸個是我佇迦巴魯河邊所看見，佇以色列上帝下面的活物；我知𪜶是基路伯。

21每一個基路伯有四款面，四支翼；翼下面有手，看起來親像人的手。

22𪜶的面的模樣，就是𪜶的形狀及款式，及我佇迦巴魯河邊看見的面仝款。每一個基路伯，攏會當對逐旁直行。