箴言 24 - 現代台語譯本漢字版(TTVH)-闽南语

19

1毋通欣羨歹人，嘛毋通愛及𪜶做堆，

2因為𪜶的心計劃強暴的代誌，𪜶的嘴談論害人的事。

20

3厝靠智慧起造，用聰明建立；

4有智識的人的房間充滿逐項寶貝及貴重的財物。

21

5有智慧的人有大能力；有智識的人加添氣力。

6欲交戰著有好的策略；參謀多就會得勝。

22

7智慧高深，戇人𣍐了解；佇公共集會中伊無話通講。

23

8計謀做歹的人會互人叫做陰謀家。

9戇人的計謀攏是罪惡；藐視人的，人人厭惡。

24

10佇患難的日失膽，氣力就減少。

25

11人受拖到死地，著給伊解救；人啲欲受刣，毋通無救伊。

12你若講「此個代誌我毋知」，監察人的心的上帝豈𣍐審判？保全你性命的豈會毋知？伊豈𣍐照逐人的所做報應？

26

13我的子啊，著食蜜，因為蜜是好；食蜜房滴落來的蜜就知甜。

14著知，智慧佇你的心嘛是按呢；你若尋著，前途就光明，向望𣍐無去。

27

15毋通親像歹人埋伏欲攻擊義人的家；毋通破壞伊住的厝。

16義人跋倒七遍嘛會閣起來；歹人一下抵著災難就倒落去。

28

17你的對敵跋倒，毋通歡喜；伊倒落去，你的心嘛毋通快樂，

18才免上主看見無歡喜，煞互伊的受氣無臨到你的對敵。

29

19毋通因為做歹的人心內不平，嘛毋通欣羨歹人，

20因為歹人無好結局，𪜶的燈會熄去。

30

21我的子啊，著敬畏上主及君王，毋通及反叛的人勾結，

22因為毀滅會對上主及君王忽然臨到恁，𪜶欲降落的災難啥人會知？

閣一寡智慧的話

23下面所記嘛是智慧的人的話：

審判的時毋通有偏心。

24給有罪的人判無罪，會受眾人咒詛，人人厭惡。

25給歹人判有罪，會得著眾人歡喜；伊會大大受祝福。

26用公正的話應答，表示真誠的友誼。

27外面的代誌準備好勢，

田園好好種作，

才來起厝，成家立業。

28毋通用無根據的見證陷害厝邊；

毋通作偽證欺騙人。

29毋通講：「伊按怎對待我，我嘛欲按呢對待伊；

我欲照彼個人的所做給伊報復。」

30我經過貧憚人的田園，

無智識的人的葡萄園，

31看見莿發甲滿滿是，

草刺遮蓋地面，

石牆嘛倒落去。

32我看見就深深想，

看了得著教示。

33閣睏一久仔，閣眠一時仔，

閣撐一下仔，

34散赤就親像賊來，

欠缺親像強盜到。