詩篇 63 - 現代台語譯本漢字版(TTVH)-闽南语

大闢佇猶大曠野的時做的詩。渴慕上帝

1上帝啊，你是我的上帝，我迫切追尋你；

親像地曠旱無水，我的心神嘴焦渴慕你；

我的肉體欣慕你到欲暈去。

2所以我佇聖所尋你，

愛看你的權能及榮光。

3我的嘴唇欲頌讚你，

因為你的慈愛比性命較好。

4我欲一世人稱讚你，

欲攑手求叫你的名。

5我的心神會滿足，親像享受豐盛的宴席；

我嘛欲用歡喜的嘴唇唱歌頌讚你。

6我倒佇眠床記念你，

暝時逐更嘛數念你。

7因為你有幫贊我，

我欲佇你的翼股下歡喜唱歌。

8我隨你隨牢牢；

你的正手扶持我。

9毋拘數想我性命的人，

𪜶會陷落佇地下上深的所在。

10𪜶會互刀劍刣，

互豺狼食。

11總是王會因為上帝來歡喜；

所有指伊咒誓的人會因為伊來誇口；

毋拘講白賊的嘴會受塞密。