阿摩司書 5 - 現代台語譯本漢字版(TTVH)-闽南语

以色列人著悔改

1 以色列人啊，著聽，

我欲對恁唱一首哀歌：

2少女以色列跋倒，

𣍐閣起來；

伊佇家己的土地互人放拺，

無人給伊扶起來。

3因為至高的上主按呢講：

以色列的城，

一千個出征，賰一百個轉來，

一百個出征，賰十個轉來。

4上主對以色列人講：

著尋求我，恁就會活。

5毋通去伯特利尋，

毋通入去吉甲，

嘛毋通過去別是巴；

因為吉甲的人一定會互人掠去，

伯特利會滅亡。

6著尋求上主，恁就會活；

若無，伊會親像炎火吞滅約瑟的家，

燒盡伯特利，

無人會當給伊拍化。

7恁慘啊，

恁歪曲正直，踐踏公義。

8恁著尋彼位創造主；

伊創造昴星及參星，

互烏暗變做黎明，

互日時變做暗暝，

命令海水摒佇地面。

伊的稱呼是上主。

9伊互堡壘忽然毀壞，

互要塞變做土堆。

10恁怨恨佇城門口主持公道的人，

厭惡講真實話的人；

11恁踐踏散赤人，

剝削𪜶所收成的，

所以恁用拍過的石頭起的媠厝住𣍐著，

好的葡萄園出產的酒嘛飲𣍐著。

12我知恁的罪過偌仔呢大，

恁的罪算𣍐了；

恁壓制義人，收賄賂，

佇城門口冤枉散赤人。

13佇此款邪惡的時勢，

巧人攏恬恬毋講話。

14著追求好，毋通追求歹，

恁才會活；

按呢，上主 — 萬軍的統帥上帝

會照恁所講的及恁同在。

15著怨恨歹，意愛好；

佇城門口主持公道；

按呢，豈採上主 — 萬軍的統帥上帝

會施恩互約瑟家賰的子孫。

16所以，至高的上主 — 萬軍的統帥上帝按呢講：

佇所有的廣場有哀哭，

佇逐條街路有人講：

「慘啊，慘啊！」

𪜶會叫作穡人來啼哭，

倩𠢕唱哀歌的來哀哭。

17佇所有的葡萄園會有哀哭，

因為我欲來給恁刑罰。

上主按呢宣告。

18恁向望上主的日的人，慘啊！

恁是按怎啲向望上主的日？

彼日是暗，毋是光。

19彼日來臨會親像人閃避獅煞抵著熊；

入去厝內，手按壁煞互蛇咬著。

20上主的日是暗，毋是光；

暗暗暗，一絲仔光都無。

21我厭惡，拒絕恁的節期，

嘛無愛恁的嚴肅會。

22恁獻燒化祭及素祭互我，

我毋接受；

恁獻肥的牲生做平安祭，

我嘛無欲接納。

23著互恁唱歌的聲離開我；

恁彈琴的調，我無愛聽。

24著互公平親像大水長流，

互公義親像江河直直流。

25 以色列人啊，恁佇曠野四十年，

豈有獻牲禮及禮物互我？

26恁扛恁為家己造的神明撒固王及迦溫星神的像。

27所以我欲互恁受掠去比大馬士革閣較遠的所在。

上主 — 萬軍的統帥上帝按呢宣告。