利未記 12 - 現代台語譯本漢字版(TTVH)-闽南语

產婦潔淨的條例

1上主閣命令摩西

2著對以色列人宣布：

若有婦仁人懷孕生後生，伊就無清氣七日，及經期內垃墋的日無清氣仝款。

3第八日，彼個嬰仔著受割禮。

4婦仁人猶啲流血，著住佇厝裡三十三日；潔淨的日滿以前，毋通摸聖的物，嘛毋通入聖所。

5伊若生查某子，就無清氣十四日，及經期的時無清氣仝款。伊猶啲流血，著住佇厝裡六十六日，才清氣。

6到潔淨的日滿，無論生後生抑是查某子，伊著獻一隻一歲的羊仔做燒化祭，一隻粉鳥仔子抑是斑鴿做贖罪祭；帶來會幕門口，交互祭司。

7祭司著將諸個獻互上主，為伊贖罪；伊就無閣因為流血無清氣。這就是婦仁人生後生抑是查某子的條例。

8伊若無夠力通獻一隻羊仔，就著用兩隻斑鴿抑是粉鳥仔子，一隻做燒化祭，一隻做贖罪祭；祭司著替伊贖罪，伊就清氣。