耶利米書 16 - 現代台語譯本漢字版(TTVH)-闽南语

猶大欲滅亡

1上主對我講：

2「你毋通佇此個所在娶某生後生查某子。

3我給你講，佇此個所在出世的囝仔及𪜶的父母

4會死佇致命的病；無人為𪜶哀哭，嘛無人給𪜶埋葬。𪜶的身屍會放佇土腳成做肥料。𪜶若毋是互人刣死，就是餓死；𪜶的屍體成做飛鳥及走獸的食物。

5「你毋通入喪家的厝，嘛毋通為𪜶哀哭，給𪜶安慰；我𣍐閣賜平安互我的子民，嘛𣍐閣憐憫𪜶，對𪜶施慈愛。

6無論好額抑是散赤攏像款會死佇遮，無人給𪜶埋葬，為𪜶哀哭；無人會割傷家己，剃光頭為𪜶哀傷。

7無人會提食物互喪家，為著𪜶的家抵著的事給𪜶安慰；無人會為著𪜶失去父母互𪜶飲安慰的酒。

8「你毋通入去宴樂的家及𪜶做夥飲食。

9上主 — 萬軍的統帥、以色列的上帝按呢講：看咧，我欲佇恁的目睭前，佇恁猶活啲的時，互歡喜快樂的聲、婚宴喜慶的聲攏對此個所在消失。

10「你給諸個人民講諸個一切的話的時，𪜶會問你：『是按怎上主欲降即大的災禍攻擊阮？阮是犯著什麼罪？佇什麼所在得罪上主 — 阮的上帝？』

11你著給𪜶講：『恁的祖先背叛我去隨別個神明，給𪜶服事敬拜。𪜶棄拺我，無遵守我的律法。

12恁比恁的祖先所做的閣較可惡，恁逐個人照固執邪惡的心做代誌，無欲順趁我。

13所以，我欲給恁對此個地趕出去，去到恁及恁的祖先攏毋識的地，暝日拜別個神明；我無欲閣憐憫恁。』」

預言流放倒轉來

14上主講：「時日一下到，人咒誓的時𣍐講：『我指彼位導以色列人出埃及的永活上主咒誓。』

15𪜶欲講：『我指彼位導以色列人離開北方的地，離開伊給𪜶流放去的逐國彼位永活的上主咒誓。』因為我欲給𪜶導轉去我賜互𪜶祖先的土地。」

啲欲來的刑罰

16上主講：「我欲派真多掠魚的人去掠諸個人，後來閣派真多拍獵的人去大山、小山，及石縫掠𪜶。

17𪜶一切的所做我攏有看見，𪜶的罪惡佇我的面前攏𣍐當隱瞞掩蓋。

18我欲加倍報應𪜶所犯一切的罪，因為𪜶去拜許個可惡、無性命的偶像，拍垃墋我的土地，用通厭惡的假神塞滿我的產業。」

耶利米的信心及祈禱

19上主啊，你是我的氣力、我的堡壘，是我抵著危險的時的避難所。萬國會對天邊海角來到你的面前，講：「阮的祖先留落來的是虛假、空虛、無利益的偶像。

20人豈會當為家己造神？諸個偶像攏毋是真神。」

21上主講：「此遍我欲互𪜶清楚識我的氣力及權能，𪜶就知我的稱呼是上主。」