但以理書 12 - 現代台語譯本漢字版(TTVH)-闽南语

1上帝的使者繼續對我講：「彼時，彼個保護你的同胞的天使長米迦勒欲出現，然後一定會有一段災難的時期；彼個災難是對開國以來毋曾有的。彼時，你許個名有記佇活命冊的同胞會得著解救。

2真多已經死去的人會閣活；有的得著永遠的性命，有的永遠受恥笑厭賤。

3有智慧的人會發光，親像天頂的光；許個導真多人歸向正直的人，會親像星辰永遠發光。

4「但以理，末日到以前，你著將諸個話保密，給此本冊封密。佇此段時間，一定有真多人專心探討奧祕的事，智識就愈加添。」

5後來，我但以理看著有兩個人徛啲：一個佇河的此旁，一個佇河的彼旁。

6其中一個對另外徛佇河水頂面，穿幼麻布的衫彼個人講：「諸個奇異的事什麼時會實現？」

7彼個徛佇河水頂面，穿幼麻布的衫的人向天攑雙手；我聽見伊指永活的主宣誓講：「閣三年半，就是殘害許個聖的子民的勢力結束的時，諸個一切的事攏會實現。」

8我聽了，𣍐明白，就問講：「我的主，諸個事的結局會按怎？」

9伊講：「但以理，你毋免操煩，因為佇末日以前，諸個話攏會封密保密。

10一定會有真多人得著洗清、潔淨，接受鍛鍊。毋拘，歹人會繼續做歹。諸個事歹人𣍐明白，只有有智慧的人才會。

11「對禁止逐日獻祭互上帝，閣𫞼彼個致到滅亡可惡的像彼日開始，著閣聽候一千兩百九十日。

12所有堅持到一千三百三十五日的人真有福氣！

13「你咧，你著堅持到結局的時。你會得著安歇，到末日，你會閣起來，享受你的福分！」