雅歌 3 - 現代台語譯本漢字版(TTVH)-闽南语

1我暝時倒佇眠床，我欲尋我心愛的；

我尋伊，尋無。

2我起來，佇城內四界行，

佇街頭巷尾

尋我心愛的；

我尋伊，毋拘尋無。

3城內巡邏的人抵著我，

我問𪜶：恁有看著我心所愛的無？

4我離開𪜶無偌遠，

就尋著我心愛的。

我給伊擒啲，毋互伊離開；

到我導伊入去阮老母的厝，

就是懷孕我彼間房間。

5 耶路撒冷的查某囝仔啊，

我指羚羊及田野的鹿母，懇切給恁吩咐，

毋通拍醒，毋通攪擾阮的愛情，

到阮歡喜滿足。

第三首(女)

6彼個對曠野來，形狀親像火燻的柱，

用沒藥，乳香，及生理人啲賣的芳粉

互伊發出芳味的是啥人？

7你看，是所羅門的轎，

四圍有六十個勇士，

攏是對以色列勇士中揀的。

8𪜶攏𠢕用劍，𠢕相戰；

逐個腰縖刀，防備暝時的危險。

9 所羅門王用黎巴嫩的柴，

為家己做一頂轎。

10柱用銀做，

蓋用金做，

坐位用紫色的材料，

內面是用耶路撒冷的查某囝仔的愛情鋪的。

11 錫安的查某囝仔啊，著出去，

去看所羅門王；

伊戴王冠，伊的老母佇伊結婚快樂的日給伊戴的。