耶利米書 38 - 現代台語譯本漢字版(TTVH)-闽南语

耶利米佇蓄水池內面

1 馬坦的子示法提雅、巴施戶珥的子基大利、示利米雅的子猶甲、瑪基雅的子巴施戶珥，聽著耶利米對民眾講：

2「上主按呢講：所有留佇此個城內面的人，攏會因為戰亂、飢荒、瘟疫死，毋拘出去投降巴比倫人的就會活，親像性命閣拾著。

3上主閣講：我欲將此個城交互巴比倫王的軍隊，伊一定會攻佔此個城。」

4彼幾個官員就去給西底家王報告，講：「請王給此個人處死，因為伊給城內賰落來的軍兵及人民講此款話，互𪜶的士氣消沉失志。此個人毋是欲互人民安全，是欲互人民受災害。」

5王給𪜶講：「我給恁講，我給伊交互恁；恁按怎給伊處理，我𣍐給恁反對。」

6𪜶就給耶利米掠起來，用索仔給伊縋落去王子瑪基雅佇護衛隊的埕的蓄水池。此個蓄水池無水，只有土糜。耶利米就陷佇土糜內面。

7 西底家王佇便雅憫門啲處理案件的時，王宮內面的太監古實人以伯‧米勒聽著人給耶利米縋落去蓄水池，

8就出王宮去對王報告：

9「我的主，我的王，許個人按呢處理先知耶利米有較過份。𪜶給伊放落去蓄水池；伊會餓死，因為城內已經無糧食啦。」

10王就命令古實人以伯‧米勒，講：「你對遮導三十個人，趁先知耶利米猶未死，給伊對蓄水池救出來。」

11以伯‧米勒就導許個人入去王宮的倉庫，提一寡舊衫破布，用索仔縋落去蓄水池內面互耶利米。

12伊給耶利米講：「你用許個舊衫破布下佇索仔頂面，挾佇你的胳下孔。」耶利米就照按呢做。

13按呢，𪜶就給耶利米對蓄水池扭起來。耶利米繼續互人拘留佇護衛隊的埕裡。

西底家請教耶利米

14 西底家王派人去給先知耶利米導來上主聖殿第三個門的入口，王對耶利米講：「有一個問題我欲請問你，你著照實講。」

15 耶利米對西底家講：「我若照實給你講，你一定會給我刣死。我給你苦勸，你嘛𣍐聽。」

16 西底家王就私下咒誓講：「我指創造咱性命永活的上主咒誓，我一定𣍐刣你，嘛𣍐給你交互許個數想你性命的人。」

17 耶利米就對西底家王講：「上主 — 萬軍的統帥、以色列的上帝按呢講：你若出去投降巴比倫王的將軍，你就會活，此個城嘛𣍐互𪜶放火燒；你及恁全家攏會當活落來。

18你若毋投降巴比倫的將軍，此個城就會交佇巴比倫人的手；𪜶會給城放火燒；你嘛𣍐當脫離𪜶的手頭。」

19 西底家王對耶利米講：「我真驚許個已經投降巴比倫的猶大人；驚巴比倫人給我交互𪜶，𪜶會給我戲弄凌辱。」

20 耶利米講：「巴比倫人𣍐給你交互𪜶啦！請你著照我對你講上主的話去做，按呢，你就會平安無事，你嘛會活。

21你若毋出去投降，上主已經按呢指示我：

22所有留佇王宮的宮女會互人掠去巴比倫王的將軍遐。許個宮女會指責你，講：

你信賴的朋友煽動你，

你互𪜶騙去；

𪜶互你的腳陷落路糊糜，

就越轉身做𪜶走。

23你的嬪妃及後生查某子攏會互人掠去巴比倫，你嘛𣍐當逃脫。你欲互巴比倫王掠去，此個城嘛會互人放火燒。」

24 西底家王給耶利米講：「你𣍐用得互人知影咱講話的內容，按呢你就𣍐死。

25若有官員知影我有及你講話，𪜶來問你，講：『你給王講什麼？王給你講什麼？你著照實給阮講，若無，阮欲給你刣死。』

26你著給𪜶講：『我干焦請求王毋通給我送倒去約拿單的厝，才免我死佇遐。』」

27後來，所有的官員果然來問耶利米；伊就照王的吩咐給𪜶答復。許個官員無閣追問，因為代誌攏無漏洩出去。

28按呢，耶利米繼續關佇護衛隊的埕裡，關到耶路撒冷受攻佔彼日。