以賽亞書 28 - 現代台語譯本漢字版(TTVH)-闽南语

警告北王國

1 以法蓮酒醉的人所啲誇耀的花冠，今慘啊！

彼蕊奢颺的媠花漸漸謝去。

𪜶佇肥媠的山谷頂面，

飲甲醉茫茫。

2看咧，主派一個有大權能有大氣力的人來攻擊𪜶，

親像強烈的雹，

毀滅的狂風，

親像暴雨，猛烈的大水瀧落大地。

3彼個酒醉的人所誇耀的花冠會受踐踏佇腳下。

4彼蕊佇肥媠的山谷頂面，

開甲真奢颺，漸漸謝去的媠花，

會親像夏天前頭水的無花果，

人看著隨時挽去食。

5佇彼日，上主 — 萬軍的統帥

欲親像榮耀的花冠，

做伊所賰的子民榮光的王冠，

6互坐啲審判彼位有公正的神，

成做𪜶佇城門口拍退對敵的氣力。

以賽亞及猶大酒醉的先知

7祭司及先知因為飲酒癲癲倒倒，

因為厚酒顛來顛去。

諸個人因為飲厚酒硞硞顛，

飲薄酒醉茫茫。

𪜶因為厚酒東倒西歪，

錯解異象，

判決反起反倒。

8𪜶的桌頂吐甲滿四界，

無一個所在無垃墋。

9𪜶講：「此個先知是欲給智識教啥人？

伊是啲給啥人解說信息？

是欲教抵仔斷奶，

抵仔離開老母胸前的囝仔是無？

10伊吱吱咕咕，哩哩嚕嚕，

遮講一寡，遐講一寡，

毋知啲講什麼。」

11按呢好，主欲用伊的子民聽無的外國話，

用別款腔口對𪜶講話。

12伊曾對𪜶講：

「這是安歇的所在，厭倦的人通來安歇；

這是歇睏的所在。」

猶久𪜶毋聽。

13所以，上主的話𪜶聽起來是：

吱吱咕咕，哩哩嚕嚕，

遮講一寡，遐講一寡。

所以，𪜶行進前，煞倒摔向，

受傷，跋落活罩，互人掠去。

錫安的基石

14恁諸個自高自大，

耶路撒冷住民的統治者，

著聽上主的話。

15因為恁誇口講：

「阮已經及死亡簽約，

嘛有及陰府結盟。

大水沖過來，𣍐淹著阮；

因為阮有用白賊做避難所，

用虛假做閃匿的所在。」

16所以，至高的上主按呢講：

「你看，我欲佇錫安下一塊石，

是試驗過的石，寶貴的基石，

通做堅固的根基；

倚靠伊的人絕對𣍐驚惶著急。

17我欲用正直做繩線，

用公義做墜繩。

冰雹欲毀壞白賊的人的避難所；

大水會淹滿恁閃匿的所在。

18恁及死亡立的約一定會廢除，

及陰府簽的約嘛會取消。

大水淹過來的時，

會給恁淹死。

19每一遍大水來的時，

會給恁沖走；

大水會逐早起淹過來，

歸暝歸日淹𣍐煞，

知影這消息的人攏會驚惶恐惶。」

20眠床傷短，身軀伸𣍐直；

棉被傷狹，蓋𣍐密。

21上主欲起來，

親像佇比拉心山；

伊受氣，

親像佇基遍谷。

伊欲做工，是特別的工；

伊欲完成伊的計劃，是奇異的計劃。

22所以，毋通自高自大，

才免縛恁的索捆愈緊；

因為我對至高上主 — 萬軍的統帥有聽著毀滅全地的命令。

上帝的智慧

23著俯耳孔聽我的聲；

著注意聽我講的話。

24農夫犁田欲種作，

豈會歸日攏啲犁？

伊豈會繼續掘土，

豈會一直挖溝？

25伊土面若耙平，

豈𣍐隨時撒大茴香、小茴香？

伊豈𣍐一綴一綴種大麥，

一列一列種小麥，

閣佇園邊種粗麥？

26因為上帝用適當的方法

給伊指示，給伊教。

27像款，大茴香𣍐用打穀機拍，

小茴香𣍐用車輪碖；

大茴香是用槌仔摃，

小茴香用柺仔拍。

28五穀著先研才會當做麵包，

毋拘無需要一直研。

農夫用馬車碖五穀，

嘛𣍐給五穀碖到碎碎。

29這攏是上主 — 萬軍的統帥的作為；

伊的計策奇妙；

伊的智慧深沉。