詩篇 21 - 現代台語譯本漢字版(TTVH)-闽南语

大闢的詩，交互聖樂長。出征的祈禱

1上主啊，王會因為你互伊的氣力歡喜，

會因為你互伊的勝利非常快樂！

2伊的心意愛的，你已經有互伊；

伊的嘴所求的，你攏有答應。

3因為你用大福氣啲迎接伊，

用純金的王冠戴佇伊的頭殼。

4伊對你求活命，你有互伊，

互伊的歲壽久久長長。

5伊因為你互伊的勝利得著大榮光；

你將尊貴威嚴賜互伊。

6你互伊有大福氣到永遠，

互伊佇你的面前歡喜快樂。

7因為王倚靠上主，

閣因為至高上帝的慈愛，伊的王位永遠穩固。

8王的手會掠著一切的對敵；

伊的正手會掠著所有怨恨伊的人。

9伊一下出現，會親像炎熱的火爐給𪜶燒滅。

上主啊，你一下出現，欲佇大受氣中給𪜶吞落去，

欲用火給𪜶燒滅。

10𪜶的子孫會對地上受剿滅；

𪜶的後代會對人的中間消失。

11𪜶欲用陰謀陷害王，

毋拘𪜶的計謀𣍐成功。

12你欲互𪜶越轉身逃走，

欲開弓射𪜶。

13上主啊，起來，顯示你的氣力；

阮欲吟詩稱讚你的大權能。