希伯來書 5 - 現代台語譯本漢字版(TTVH)-闽南语

1逐個大祭司攏是對人的中間揀出來，受指派替人服事上帝，為著𪜶的罪獻禮物及祭品。

2大祭司，因為伊本身佇逐方面攏軟弱，所以會當體諒無知及失迷的人。

3因為按呢，伊有義務為著人民，嘛著為家己的罪獻祭。

4無人家己得著大祭司此個尊貴的職份；只有親像亞倫，互上帝選召的才會得著。

5像款，基督嘛毋是家己爭取大祭司的榮耀，反轉是上帝對伊講：

你是我的子，

我今仔日生你。

6佇別位伊嘛有講：

照麥基洗德的班次，你永遠作祭司。

7耶穌在世的時曾大聲喉叫閣流目屎，向彼位會當救伊脫離死亡的上帝祈禱懇求。因為伊的虔誠，上帝有聽伊的祈求。

8雖然伊是上帝的子，猶久有對所受的苦難學習順服。

9既然上帝互伊達到完全的地步，伊就成做所有順服伊的人永遠得救的根源，

10互上帝指定伊照麥基洗德的班次作大祭司。

11關係耶穌作大祭司的事，阮有真多話愛講，毋拘得說明，因為恁耳孔鈍。

12照講，恁早就應該做老師啦，毋拘恁猶需要人給恁教上帝信息的初步；恁猶需要食奶，𣍐當食飯。

13食奶的攏是嬰仔，猶𣍐曉了解是非的道理。

14大人才食飯；𪜶屬靈的心竅有經過實際的操練才會曉分別好歹。