利未記 3 - 現代台語譯本漢字版(TTVH)-闽南语

1若有人欲獻牛做平安祭，著對牛群的中間取一隻無瑕疵的牛抑是牛母，給伊牽來上主的面前。

2彼個人著按手佇彼隻牛的頭殼頂，佇會幕的門口給刣。亞倫的後代做祭司的，著將血灑佇祭壇的四周圍。

3-4奉獻的人著對平安祭的祭物，將腹內及伊頂面的油、兩粒腰子及𪜶邊仔的油，以及肝及伊的網紗攏提起來，用火燒獻互上主。

5亞倫的子孫就給諸個下佇壇裡啲𤏸的柴頂面，及燒化祭做夥燒做芳芳的祭物，獻互上主。

6若有人欲獻羊做平安祭互上主，著對羊群的中間取一隻無瑕疵的羊抑是羊母，給伊牽來。

7彼個人若欲獻綿羊仔，著牽來上主的面前，

8按手佇彼隻羊仔的頭殼頂，佇會幕的門口給刣。亞倫的子孫著將血灑佇祭壇的四周圍。

9-10奉獻的人著對平安祭的祭物取油，就是將尾胴骨以下歸支肥的尾、腹內及伊頂面的油、兩粒腰子及𪜶邊仔的油，以及肝及伊的網紗攏提起來，通做用火燒獻互上主的祭物。

11祭司著將諸個下佇祭壇頂，用火燒做食物獻互上主。

12若有人欲獻山羊做祭物，著牽來上主的面前，

13按手佇彼隻山羊的頭殼頂，佇會幕的門口給刣。亞倫的子孫著將血灑佇祭壇的四周圍。

14-15奉獻的人著將腹內及伊頂面的油、兩粒腰子及𪜶邊仔的油，以及肝及伊的網紗攏提起來，通做用火燒獻互上主的祭物。

16祭司著將諸個下佇祭壇頂，用火燒做芳芳的食物。所有的油攏著歸上主。

17恁無論住佇什麼所在，油及血攏毋通食；這欲做恁世世代代永遠的規例。