以西結書 2 - 現代台語譯本漢字版(TTVH)-闽南语

1上帝對我講：「人子啊，徛起來！我有話欲給你講。」

2伊講話的時，上帝的神進入我的內面，互我徛起來。我聽見伊給我講：

3「人子，我欲派你去以色列人，就是背逆我的國民遐。𪜶及𪜶的祖先背逆我，現在猶啲背叛我。

4諸個子民面皮厚，心硬，我派你去𪜶遐，傳達我 — 至高的上主欲給𪜶講的話。

5不管諸個背逆的人欲聽抑是毋聽，𪜶應該知有一個先知佇𪜶中間。

6「人子，毋免驚𪜶，嘛毋免因為𪜶講的話驚惶。雖然𪜶會反抗，看𣍐起你，互你親像受草刺及蒺藜包圍，閣親像𫢶佇蝎仔蟲中間，你毋免驚𪜶講的話，嘛毋免因為𪜶的面色著驚。

7不管𪜶欲聽抑是毋聽，你著將我的話給𪜶講，因為𪜶是背逆的人。

8「人子，著聽我給你講的話；毋通及許個背逆的人像款背叛我。開你的嘴，將我欲互你的物食落去。」

9看咧，我看見一支手伸過來我遮，手內有一卷冊卷。

10伊佇我的面前搋開彼卷冊卷；我看見冊的雙面攏有寫字，內面寫的是哀歌、吐氣，及災禍的話。