何西阿書 4 - 現代台語譯本漢字版(TTVH)-闽南语

上主控告以色列人

1 以色列人，著聽上主的話；

上主欲控告此塊地的住民，

因為𪜶無誠實，無仁慈，無人真正識上帝，

2干焦啲濫糝咒誓、背約、凶殺、

偷提、姦淫、強暴，繼續刣人流血。

3因為按呢，此個地會焦去；

所有住佇遮的，連田野的獸，空中的鳥攏會消滅，

海裡的魚嘛會無去。

上主責備祭司

4毋通互相控告，毋通彼此指責；

我責備的是恁諸個做祭司的。

5日時，恁會跋倒，

暝時，先知嘛會及恁像款跋倒；

我欲消滅恁的人民。

6我的子民因為無知滅亡；

恁毋承認我，

我嘛毋承認恁做祭司。

既然恁棄拺恁的上帝的律法，

我嘛一定欲棄拺恁的子孫。

7恁祭司的人數愈多愈得罪我；

所以我欲互恁的尊榮變做見笑。

8恁愛我的子民犯較多的罪，

通得著較多贖罪的祭物。

9按呢，恁祭司會及人民像款受刑罰；

我欲照恁的所做辦恁，照恁的行為報應恁。

10恁食，食𣍐飽；

行淫，生產嘛𣍐增加；

因為恁棄拺上主，去隨別個神明。

上主譴責拜偶像

11酒及新酒會互人失去良知。

12我的子民去問柴頭，

抽籤卜卦求指示；

淫亂的神導𪜶離開正路，

𪜶行淫背叛𪜶的上帝。

13𪜶佇山頂獻祭，佇山崙仔燒香，

佇遐有橡樹、楊樹、松節樹涼爽的蔭影。

因為按呢，恁的查某子淫亂，恁的新婦犯姦淫。

14雖然恁的查某子淫亂，恁的新婦犯姦淫，

我𣍐給𪜶刑罰，

因為恁諸個查甫人去及娼妓另外住，

及寺廟的妓女鬥陣獻祭；

此款無知的人民一定滅亡。

15雖然以色列淫亂，

毋拘猶大毋通犯罪。

毋通去吉甲，

毋通上去伯‧亞文，

毋通指永活的上主咒誓。

16 以色列固執親像硬鼻的牛母；

上主豈會養飼𪜶，親像佇開闊的所在養飼羊？

17既然以法蓮

及偶像結連，出在𪜶去！

18𪜶飲甲醉茫茫閣繼續行淫；

𪜶愛見笑，無愛榮譽。

19風會用翼給𪜶捲去；

𪜶獻互偶像的祭祀會互𪜶致到見笑。