雅歌 1 - 現代台語譯本漢字版(TTVH)-闽南语

第一首

1 所羅門詩歌中的詩歌。

(女)

2來，用你的嘴給我唚；

你的愛情比酒較好。

3你的芳油實在真芳；

你的名親像倒出來的芳油；

所以，無一個查某囝仔無愛你。

4請牽我，咱緊來走！

王啊，導我入去你的房間，

咱來歡喜快樂；

你的愛情比酒較好，

莫怪所有的查某囝仔攏愛你。

5 耶路撒冷的查某囝仔啊，

我烏，毋拘生做媠，

親像基達的布棚，

親像所羅門的帳簾。

6毋通因為我皮膚烏烏直直給我看，

彼是日頭曝的。

我的兄弟對我受氣，

叫我去顧葡萄園；

我煞𣍐當照顧家己的園。

7我心愛的啊，給我講，

你佇什麼所在啲飼羊，中晝佇叨位互羊歇睏，

我才免佇你同伴的羊群中四界尋你。

(男)

8查某囝仔中上媠的啊，你若毋知我佇叨位，

隨羊群的腳跡去，

佇牧者的布棚邊飼你的山羊仔。

9我的愛人，我看你親像法老戰車的馬。

10你鬢邊的妝飾互你的面真媠；

你的頷頸掛真珠鍊真好看。

11阮欲給你做金的鍊仔，鑲銀的鈕仔。

(女)

12王坐桌的時，

我的哪噠芳油淐出芳味。

13我親愛的，你是一包沒藥，

掛佇我的胸前。

14我親愛的，你是一葩指甲花，

佇隱‧基底的葡萄園內啲開。

(男)

15我的愛人，你真媠，實在真媠！

你的目睭親像粉鳥。

(女)

16我親愛的，你真英俊，我真合意！

咱用青翠的草埔做床舖，

17用柏香柴做厝的樑，

松柏柴做桷仔。