1啊，黃金竟然暗淡無光，
純金竟然失去光彩！
聖殿的石頭竟然散甲歸街路。
2 錫安尊貴的子民價值親像純金，
現在煞互人看做燒瓷師傅做的粗瓷。
3豺狼猶久互伊的子𠲿奶，
我的子民竟然殘忍親像曠野的鴕鳥。
4食奶的嬰仔無奶通𠲿，
嘴焦甲嘴舌黏佇頂顎；
囝仔討食物，
連一屑仔都無人分互𪜶。
5平時食山珍海味的人，
現在餓死佇街路；
過去生活奢侈的人，
現在佇糞埽堆尋物食。
6上帝一目𥍉久毀滅所多瑪，
無用人的手；
我的子民的罪，
比所多瑪住民的罪閣較重。
7過去，錫安的拿細耳人比雪較白，
比奶較純；
𪜶的身軀比紅寶石較紅，
生做媠親像藍寶石。
8現在，𪜶的面比火炭較烏，
消瘦落肉，
瘦甲親像柴；
𪜶佇路裡無人會認得。
9互人刣死的比餓死的較好；
餓死是無食物，慢慢消瘦來死。
10我的子民受毀滅的時，
連仁慈的老母都煮家己的子食！
11上主發大受氣，
摒出腹內的烈火，
用火燒錫安，
連地基嘛給伊燒毀。
12世間的君王及地上的住民，
攏𣍐當相信
有對敵會當攻入耶路撒冷的城門。
13這攏是因為𪜶先知的罪惡及祭司的罪孽；
𪜶刣死城內公義正直的人。
14𪜶親像盲人佇街路四界踅，
歸身軀沐甲全全血，
無人敢摸著𪜶的衫，恐驚無清氣。
15人喝𪜶：走！閃開！
恁諸個無清氣的人，倚來！
𪜶變做難民四界流浪，
無一個國家肯收留𪜶。
16上主親身給𪜶趕散，
無閣看顧𪜶；
祭司無受看重，
長老無受尊重。
17阮看甲目睭花，猶看𣍐著救助的向望；
阮聽候閣再聽候的，
竟然是一個無力解救阮的國家。
18對敵追蹤阮的腳步，
害阮毋敢佇街路行。
阮的日子滿啦！
阮的結局到啦！
19追趇阮的人比空中啲飛的鷹鳥較緊；
𪜶佇山裡追趇阮，
佇曠野埋伏聽候阮。
20上主抹油選立的君王是阮的性命；
阮曾按呢想：
佇伊的保護下，阮會當佇列國中生存。
毋拘伊落佇陷坑互人掠去。
21 以東人，烏斯的住民啊，
出在恁歡喜快樂！
苦杯嘛會輪到恁飲；
恁欲飲甲酒醉，赤身露體。
22 錫安啊，你罪過的刑罰已經滿，
上主𣍐閣互你受放逐。
以東啊，上主欲刑罰你，
欲暴露你的罪惡。
Who We AreWhat We EelieveWhat We Do
2025 by iamachristian.org,Inc All rights reserved.
