耶利米書 24 - 現代台語譯本漢字版(TTVH)-闽南语

1 巴比倫王尼布甲尼撒對耶路撒冷將約雅敬的子猶大王約雅斤，以及猶大國的官員、作工師傅及拍鐵師傅攏掠去巴比倫。此個代誌以後，上主互我看見佇上主聖殿頭前有兩籠無花果：

2一籠真媠親像初熟的無花果，一籠真僫，僫甲𣍐食得的無花果。

3上主問我：「耶利米，你有看見什麼？」

我應講：「我有看見無花果；好的真好，僫的真僫，僫甲𣍐食得」。

4上主閣對我講：

5「我上主 — 以色列的上帝欲將許個對此塊土地流放去巴比倫的猶大人，當做好的無花果好款待𪜶。

6我欲看顧𪜶，賜福𪜶，導𪜶轉來此塊土地。我欲給𪜶重建，𣍐給𪜶拆毀；我欲給𪜶栽種，𣍐給𪜶拔出。

7我欲賜𪜶一粒認識我的心，承認我是上主。𪜶欲做我的子民，我欲做𪜶的上帝，因為𪜶欲一心一意歸向我。」

8上主閣講：「猶大王西底家及伊的官員、賰落來留佇此塊土地的耶路撒冷人民，以及住佇埃及的猶大人，我欲給𪜶當做僫甲𣍐食得的無花果。

9我欲互𪜶抵著大災難，互天下萬國的人看了攏驚惶討厭𪜶；我欲互𪜶佇流放去的逐所在，互人侮辱、恥笑、戲弄，閣受咒詛。

10我欲用戰亂、飢荒，及瘟疫除滅𪜶，互𪜶對我賞賜𪜶及𪜶列祖的此塊土地消失。」