耶利米書 45 - 現代台語譯本漢字版(TTVH)-闽南语

上主應允巴錄

1 約西亞的子約雅敬作猶大王第四年，尼利亞的子巴錄將先知耶利米所傳的信息記佇冊裡。彼時耶利米給巴錄講：

2「巴錄啊，上主 — 以色列的上帝按呢講：

3『你有啲講：我有夠慘；上主佇我痛苦的時閣加添我的憂愁。我吐氣吐甲真倦，嘛無通有一絲仔安歇。』」

4上帝吩咐耶利米著給巴錄講：「上主按呢講：『我欲拆毀我所重建的，給我所栽種的拔起來；佇全地我攏欲按呢做。

5你啲為家己圖謀大事是無？毋通圖謀。看咧，我欲降災禍互所有的人類。毋拘你無論去叨位，我攏會保全你的性命。』上主按呢宣告。」