何西阿書 8 - 現代台語譯本漢字版(TTVH)-闽南语

上主譴責拜偶像

1上主講：

著歕哨角發警報！

對敵親像鷹鳥衝落來，

欲攻擊上主的厝，

因為我的子民破壞我的約，違背我的律法。

2𪜶對我哀叫講：

「上帝啊，阮以色列人承認你是阮的上帝！」

3毋拘以色列拒絕良善，

所以對敵會追趇𪜶。

4𪜶設立君王，毋是照我的意思；

𪜶設立首領，我無承認。

𪜶用金，用銀造偶像，

結果家己受毀滅。

5 撒馬利亞人，著棄拺恁的牛仔像！

我對恁發大受氣；

恁著閣偌久才會放棄偶像崇拜？

6偶像是以色列的師傅鑄造的；𪜶毋是上帝。

撒馬利亞的牛仔像一定會受摃碎。

7𪜶撒的是風，收的是捲螺仔風，

𣍐大欉，𣍐結實；

若會結實，嘛會互外族人食食去。

8 以色列已經受吞滅；

現在佇列國中親像無路用的器具。

9 以色列親像野驢四界走，走去亞述；

以法蓮出賣家己互愛人。

10𪜶嘛佇列國中出賣愛情，

我欲給𪜶集倚來，給𪜶刑罰；

𪜶連鞭會佇亞述大王的壓迫下受苦。

11 以法蓮為著欲贖罪，逐所在起祭壇；

祭壇愈多，犯罪愈加添。

12我為著𪜶寫真多律法，

毋拘𪜶看做及𪜶攏無關係。

13𪜶獻祭互我，毋拘獻的肉家己食了了；

我上主無欲接納。

今，我欲給𪜶的罪記啲，給𪜶刑罰；

我欲互𪜶倒轉去埃及。

14 以色列起宮殿，𣍐記得𪜶的創造主；

猶大嘛起真多堅固的城，

我欲降火燒𪜶的城，燒毀𪜶的堡壘。