以賽亞書 62 - 現代台語譯本漢字版(TTVH)-闽南语

錫安的申冤及拯救

1為著耶路撒冷的緣故，我𣍐恬恬，

為著錫安的緣故，我𣍐靜靜；

直到伊的公義親像光發出，

伊的拯救親像火把啲𤏸。

2 耶路撒冷啊，萬國攏欲看見你得勝；

萬王欲看見你的榮耀。

人欲用新的名稱呼你，

是上主本身給你號的。

3你是上主手中上媠的花冠，

是你的上帝手裡的王冠。

4你𣍐閣互人叫做「受棄拺的」，

你的土地𣍐閣叫做「荒廢的」。

人欲稱呼你做「你是我上意愛的」，

給你的土地叫做「有歸屬的」。

因為上主意愛你；

你的土地會有歸屬。

5親像少年人娶少女，

你的住民嘛會按呢疼惜你；

親像新郎意愛新娘，

你的上帝嘛會按呢意愛你。

6 耶路撒冷啊，我有派守望的人

佇你的城牆頂啲顧；

𪜶暝日攏𣍐靜靜。

求叫上主的人，

恁攏毋通歇睏，

7互上主無通歇睏，

直到伊重建耶路撒冷，

互此個城佇全地受稱讚。

8上主已經攑伊的正手，

用伊有氣力的手骨立誓：

我絕對𣍐閣將你的五穀互對敵做食物，

外國人嘛𣍐閣飲你勞苦得來的酒。

9種作的人會當食伊所種的，

閣稱讚上主；

收成葡萄的人會當

佇我聖殿的埕飲酒。

10 耶路撒冷的住民啊，著出去，出去城門外，

為著轉來的同胞開路。

著修造一條大路；

將石頭搬開，

為萬民𫞼大旗做記號。

11上主宣布的話已經傳到天邊海角；

著對耶路撒冷的住民講：

「看咧，你的拯救者啲來啦；

及伊做夥的，有伊所解放的人，

行佇伊頭前的，有伊解救的子民。」

12人欲叫𪜶做

「上主所救贖聖的子民」；

耶路撒冷欲叫做「受看顧，無受棄拺的城」。