阿摩司書 4 - 現代台語譯本漢字版(TTVH)-闽南语

1住佇撒馬利亞山 巴珊的牛母，著注意聽。

恁欺負散赤人，壓制艱苦人，

對恁丈夫講：

「酒捧來，咱來飲。」

2至高的上主指家己的聖名立誓，講：

「看咧，日子啲欲到，

人欲用鉤仔給恁鉤去，

用釣魚鉤給所賰的拖去。

3恁逐個人會互人拖去城牆的破隙，

對遐擲出去。」

上主按呢宣告。

4做恁去伯特利犯罪，

出在恁去吉甲加添恁的罪；

逐早起獻恁的祭物，

每三日獻恁所得著的十分一；

5閣獻有酵的餅做謝恩祭，

大聲展恁甘心獻的祭。

以色列人啊，這豈毋是恁合意做的？

至高的上主按呢宣告。

6我互恁佇逐個城嘴齒無物通哺，

佇恁徛起的所在攏無物通食；

恁猶久毋歸向我。

上主按呢宣告。

7收割前三月日久，

我無落雨互恁；

我互此庄有雨，

彼庄無雨；

我互此坵園有雨，

彼坵園無雨煞焦去。

8按呢，兩三個庄社的人蹁來蹁去，

蹁到另外一個庄社尋水飲，

嘛𣍐止嘴焦；

恁猶久毋歸向我。

上主按呢宣告。

9我用火燒風，用病害攻擊恁，

破壞恁的田園及葡萄園；

無花果樹及橄欖樹嘛互大隻草蜢食了了；

恁猶久毋歸向我。

上主按呢宣告。

10我降瘟疫佇恁中間，親像早前降佇埃及；

我佇戰場刣死恁的少年人，

閣恁的戰馬嘛互人搶去；

營內屍體的臭味淐到恁的鼻孔；

恁猶久毋歸向我。

上主按呢宣告。

11我毀滅恁，

親像以前毀滅所多瑪 蛾摩拉；

恁親像對火中扭出來的一塊柴；

恁猶久毋歸向我。

上主按呢宣告。

12 以色列啊，我欲按呢對待恁。

以色列啊，既然我欲按呢做，

恁著準備好勢來見恁的上帝。

13看咧，造山造風，

將伊的心意指示人，

互烏暗變做光明，

腳踏佇地高的所在彼位，

伊的稱呼是上主 — 萬軍的統帥上帝。