帖撒羅尼迦前書 1 - 現代台語譯本漢字版(TTVH)-闽南语

1我保羅、西拉，及提摩太寫批互帖撒羅尼迦，屬父上帝及主耶穌基督的教會。

願恁得著恩典及平安！

帖撒羅尼迦人的生活及信心

2阮時常為著恁大家感謝上帝，佇祈禱中不時想著恁。

3阮佇咱的父上帝的面前數念恁靠信心所做的工，出佇疼心的勞苦，及對咱的主耶穌基督的向望所表現的堅忍。

4兄弟姊妹，阮知，恁是上帝所疼、所揀選的，

5因為阮傳福音去到恁遐，毋是只有用言語，嘛靠大能力及聖神，以及對福音有完全的確信。照恁所知，阮佇恁中間的時作人什麼款，攏是為著欲互恁得著利益。

6閣恁有學阮嘛有學主，雖然佇真多苦難中，恁猶久用聖神所賜的歡喜來領受信息。

7對按呢，恁成做馬其頓及亞該亞全體信徒的模範。

8因為主的信息是對恁傳出，毋若佇馬其頓及亞該亞，恁對上帝的信嘛傳到逐所在，所以毋免阮閣講什麼。

9𪜶家己有講起，阮佇恁遐的時偌呢受恁歡迎，恁按怎離開偶像歸向上帝，來侍奉活閣真的上帝，

10聽候伊的子對天來；伊互耶穌對死人中閣活，來拯救咱脫離欲來的審判。