詩篇 9 - 現代台語譯本漢字版(TTVH)-闽南语

大闢的詩，交互聖樂長；用高音唱。感謝上帝的公義

1上主啊，我欲全心感謝你；

我欲報揚你一切奇妙的作為。

2我欲因為你歡喜快樂；

至高的上帝啊，我欲稱讚你的名。

3我的對敵越轉身撤退跋倒，

攏佇你的面前滅亡。

4你有替我申冤，替我辯護；

你坐佇寶座，照公義審判。

5你責備列邦，互歹人滅亡；

你永遠擦消𪜶的名。

6對敵受毀滅，永遠荒廢；

你毀壞𪜶的城，

無人閣會記得𪜶。

7毋拘上主坐位作王到永遠；

伊已經安置伊的寶座欲審判。

8伊欲照公義審判世間，

照正直裁判萬民。

9上主是受壓迫的人的要塞，

是𪜶患難的時的避難所。

10識你的名的人會倚靠你；

因為上主，你毋曾棄拺尋求你的人。

11著稱讚佇錫安作王的上主，

將伊的作為報揚佇萬民的中間。

12因為伊無𣍐記得困苦的人，

為人申冤的上帝會聽𪜶的哀求。

13上主啊，求你憐憫我，

你有對死亡的門救我出來；

求你監察怨恨我的人按怎啲苦楚我，

14互我通講起你一切通謳咾的代誌。

我欲佇錫安的城門為著你的拯救歡呼。

15列邦跋落家己所掘的陷坑；

𪜶的腳纏佇𪜶祕密張的羅網。

16上主已經顯明家己，施行審判；

歹人互家己手的所做纏著。

17歹人攏會落陰府；

毋認上帝的列邦嘛會按呢。

18散赤人一定𣍐永遠互上帝𣍐記得；

困苦人的向望一定𣍐永遠無去。

19上主啊，求你起來，毋通互人較贏；

求你互列邦佇你的面前受審判。

20上主啊，求你互𪜶驚惶，

互列邦知家己不過是會死的人若定。