1彼時有先知哈該，及易多的孫先知撒迦利亞，奉以色列上帝的名，對猶大及耶路撒冷的猶太人傳達上帝的話。
2撒拉鐵的子所羅巴伯，及約薩達的子耶書亞，就攏起來著手重建耶路撒冷上帝的聖殿；有上帝的先知及𪜶做夥，幫贊𪜶。
3像彼時，河西省的總督達乃，及示他‧波斯乃，以及𪜶的同事，來問講：「啥人下令互恁起此間殿，完成此個工程？」
4𪜶閣討起造聖殿的人的名單。
5毋拘上帝看顧猶大的長老，互𪜶免受阻擋停工。許個官員將此個代誌上奏大流士，聽候伊的回復。
6 河西省的總督達乃，及示他‧波斯乃，以及伊的同事，就是河西省的官員，上奏大流士王的批記佇下面：
7願皇帝大流士萬事順利。
8願皇上查明。阮去猶大省，發見偉大上帝的聖殿抵啲重建。此個殿用大塊石起造，樑插入牆內，工程進行真緊閣順利。
9彼時，阮問許個長老：「啥人下令互恁起此間殿，完成此個工程？」
10閣問𪜶的首領的名，通上奏互皇上知。
11𪜶按呢應阮講：「阮是天地的主宰上帝的僕人。阮現在啲重建的聖殿，是真多年前以色列一位偉大的王起造的。
12毋拘阮的列祖惹天頂的上帝受氣，伊將𪜶交佇迦勒底人巴比倫王尼布甲尼撒的手；王就拆毀此間殿，掠人民去巴比倫。
13塞魯士做巴比倫皇帝第一年，下令重建此間上帝的殿。
14以前尼布甲尼撒對耶路撒冷上帝的聖殿搶去下佇巴比倫神廟的金銀器具，塞魯士王將許個提出來，交互伊所設立的猶大省長設巴薩，
15對伊講：『著帶諸個器具去下佇耶路撒冷的殿，嘛著佇原位起上帝的殿。』
16對按呢，設巴薩就來下耶路撒冷上帝聖殿的地基；此間殿重建的工程對彼時到現在猶未完成。
17「今，皇上若看做妥當，請查明巴比倫的皇家記錄，看塞魯士王有下令佇耶路撒冷重建上帝的聖殿抑無。關係此個事，請皇上裁決，降旨指示阮。」
Who We AreWhat We EelieveWhat We Do
2025 by iamachristian.org,Inc All rights reserved.
