以賽亞書 31 - 現代台語譯本漢字版(TTVH)-闽南语

上帝欲保護耶路撒冷

1慘啊，許個落去埃及求幫贊的人！

𪜶倚靠馬，

倚靠真多戰車，

倚靠真強的馬兵。

𪜶無愛仰望以色列神聖的上帝，

嘛無欲尋求上主的幫贊。

2毋拘，上主有智慧，

伊會降災難，

𣍐收回伊的話，

會起來攻擊歹人的家，

對抗許個幫贊作歹的人。

3 埃及人不過是人，毋是上帝；

𪜶的馬是血肉，毋是神靈。

上主一下出手，

幫贊的會跋倒，

受幫贊的會倒落去；

兩旁的人攏會做夥滅亡。

4上主有對我按呢講：

獅抑是獅仔豚為著伊的獵物噤噤哮，

歸陣牧者集倚來攻擊伊的時，

伊𣍐因為𪜶的哄喝著驚，

𣍐因為𪜶的喧嘩走閃。

親像按呢，上主 — 萬軍的統帥會落來錫安山的山嶺作戰。

5親像搋翼啲飛的鳥按怎保護伊的子，

上主 — 萬軍的統帥嘛欲按呢保護耶路撒冷；

伊欲守護，欲解放，

欲解救，欲保守。

6 以色列人啊，著悔改，歸向恁所背逆的上主。

7佇彼日，逐個人欲掃除金的偶像及銀的偶像，就是恁雙手所造致到恁家己犯罪的偶像。

8 亞述會死佇刀下，毋是因為人的刀造成的；

亞述會互刀吞滅，毋是因為人的刀。

𪜶互刀劍追趇逃走；

𪜶的少年人一定會做苦工。

9 亞述王會恐惶消熔；

𪜶的官長因為驚惶放拺軍旗逃走。

上主按呢宣布。

上主佇錫安山有火，

佇耶路撒冷有火爐。